Siumut taama immikkoortortaqarfeqartiginngilaq
Partiip Siumup allattaanera Mikael Petersen ippassaq unnukkut radio aviisimut uppernarsarpaa, Siumup immikkoortortaqarfii nunatsinni 70-iusut, oqaatigalugulu ilaasortat amerliartuinnavissut. Tamannali eqqunngitsoq radio aviisip misissuinerani paasivarput.
Radio aviisip misissueqqisaarneratigut paasivarput
Siumup immikkoortortaqarfii 71-unatik immikkoortortaqarfiit ingerlasut 56-iusut.
Siumut immikkoortortaqarfiini siulersuisut allattorsimaffiat december 2007-meersumi atuarneqarsinnaavoq immikkoortortaqarfiit ilaat siulersuisoqanngikkaluarlutik, immikkoortortaqarfiup allattorsimaffianut allanneqarsimasut.
Soorlu nunatta kujataani Igalikumi Qassimiunilu Siumumi siulersuisoqanngikkaluarluni immikkoortortaqarfittut ingerlasutut nalilerneqarsimasut ippassaq Siumumi partiip allattaat Mikael Petersenimit oqaatigineqarpoq. Illoqarfinni nunaqarfinniluunniit 15-ni siulersuisuupput inuk ataaseq marlulluunniit. Mikael Petersen aamma oqarpoq sumiiffiit ilaanni nunaqarfiit inukittaqimmata immikkoortortaqarfiit pingasuinnarnik siulersuisoqaraangata immikkoortortaqarfittut isigineqartartut. Mikael Petersen aperaarput sooq immikkoortortaqarfiit marluinnarnik inuttalinnik siulersuisullit immikkoortortaqarfittut allanneqarsimanersut akivoq, sumiiffimmi inuit marluugaangata immikkoortortaqarfiiunatik attaveqaatitut naatsorsuunneqartartut.
Partiip siulittaasua Hans Enoksen februarimi Siumut ataatsimeersuarnissaanut qineqqusaassanersoq ullumi aperigatsinni akivoq suli oqaaseqarsinnaanngikkallarluni. Siumut qullersaqarfianit oqaatigineqarpoq Siumumut siulittaasunngorniarnermut suli qinigassanngortittoqarsimanngitsoq.
