Siumut sunniuteqarnerorusuppoq

Kommunerujussuit aningaasatigut artorsartut immikkut iliuuseqarfigineqarnissaat, nunatsinni sumiiffiit ilaani suliffissaaleqineq  34 procentinngorsimasoq, akiorniarlugu iliuuseqartoqarnissaa sinerissamilu sanaartornerup maanna unissimasup aallarteqqinneqarnissaa,  illuatungiliuttunit suliniutigineqarniartoq  Siumup siulittaasuata Aleqa Hammondip erseqqissarpaa.

- Suliffissaaleqinerup akiorniarneqarnissaa Siumumit pingaarnertut sulissutiginiarneqarpoq. Suliffissat pilersinneqarnissaannut erseqissumik pilersaarusiornikkut suliffinnillu nutaanik pilersitsisoqarnikkut suliffissaaleqineq akiorniarneqarpoq. Taakkua aningaasalersorneqassapput, suliffeqarfiit avataanersut akitsuusersorneqarnerisigut, Siumup siulittaasua Aleqa Hammond oqarpoq.

Suliffeqarfissuit avataaneersut nunatsinni aatsitassarsiorniarlutik kissaateqartut, pinngitsooratik  nunatta karsianut akitsuutinik akileeqqaartarnissaat Siumumit qulakkeerniarneqarpoq.

Aningaasanut inatsisissap sapinngisamik partiinit tamanit isumaqatigiissutigineqarnissaanut Siumut ammanersoq Aleqa Hammondimut apeqqutigaarput.

Partiilli piumasaat kisimik eqqarsaatigineqassanngitsut Aleqa Hammond isumaqarpoq.

Suliffeqarfissuit piginneqatigiiffissuillu nunatsinnut tikittartut aatsitassarsiorniarlutik kissaateqartut akitsuutinik nunatta karsianut aningaasalersuinissaannut,  eqqarsaat inuiattut katersuuffiusariaqartoq, Aleqa Hammond isumaqarpoq.

Ukioq mannamut aningaasanut Inatsisissaq siorna isumaqatigiinniutigineqarmat, taamani aningaasanut naalakkersuisuusoq Palle Christiansen, Siumumit appisaluunneqarpoq, inuttaa isumaqatigiinniarnernut apeqqutaalluinnarnerarlugu.

Siumup aningaasaqarnermut oqaaseqartartua, Per Berthelsen, taamani ima oqarpoq: 

- Aningaasaqarnermut Naalakersuisuusimasup Palle Christiansenip oqaatsit atortagai
suleqatiginnikkusussuseqarnermut toqusaataasarput, nikaginnippalaartorujussuarmik nipeqartarpoq, allaat isumalluarnerit ipitittarlugit - , Per Berthelsen Siumumeersoq taamatut oqarpoq.

Aningaasanut inatsissamut sinnersuutit siulliit aappaagumut atuuttussat aningaasaqarnermut naalakkersuisumit Maliina Abelsenimit qaammatip tulliuittup ingerlanerani saqqmmiunneqarnissaat naatsorsuutigineqarpoq.

Aningaasaqarnermut inatsisissaq siorna isumaqatiginniutigineqarmat, aningaasaqarnermut Naalakkersuisup Palle Christiansenip inuttut kinaassusia apeqqutaasimaqaaq.  Maliina Abelsen maanna isumaqatigininiarnissami siuttuussammat qanoq issangatinneraa apeqqutigaarput.

Siumut Naalakkersuiusinit isumaqatiginniarnissanut suli qaaqqusaanikuunngitsut kisiannili kaffisoriaqqusaanikuusimasut ataasiarlutillu saqqummiussinikuusut, Aleqa Hammond akivoq. Taanna neriuppoq isumaqatiginniarnermut qaaqqussaajumaarlutik.

Aappaagumut anigaasanut inatsisissatut siunneersuut, aningaasaqarnermut naalakkersuisup Maliina Abelsenip qaammatip tulliani saqqummiutissagaa ilimagineqarpoq .