Siumut Socialdemokratillu suleqatigiinnissamik isumaqatigiissuteqarput

Socialdemokratit Siumullu siunissami suleqatigiinnissartik pillugu ullumi ataatsimeeqatigiimmata qungujulasoqarpoq eqitaartoqarlunilu.
aggustip 19-at 2011 14:51

Isumaqatigiinnginnerit tamarmik peerput, partiit siulittaasui suleqatigiinnissamut isumaqatigiissummik atsioqatigiiutigalutik oqariartuuteqarput.

- Suleqatigiinnissamut isumaqatigiissutitsinni takuneqarsinnaasutut Issittoq pillugu apeqqutinut isumaqatigiittorujussuuvugut, aamma naatsorsuutigivarput Issittoq pillugu apeqqutit ukiuni tulliuttuni initunerunissaat. Tamakkulu pillugit qanittumik suleqatigiikkusuppugut, Helle Thorning Schmidt, tusagassiortunik naapitsinermini qilalukkap tuugaavaneersumik kusanarluinnartumik ujameqartoq oqarpoq.

Siumup folketingimut qinigassanngortitai socialdemokratit siulittaasuanut qaammammi kingullermi allakkanik ammasunik nassiussaqarput. Siumup Folketingimut qinigassanngortitai allakkaminni ilaatigut socialdemokratip Dan Jørgensenip uuliasiornermut, puisip amiinik EU-mut eqqusseqqusiunnaarnermut kiisalu arfanniartarnermut tunngasunut oqariartuutaanut isornartorsiuipput. Kisianni Helle Thorning-Schmidtip isumaqatigiinngittoqarsorinngilaa.

- Ilimaginngilara Socialdemokratit aamma Siumut apeqqutini ukunani isumaqatigiinngissuteqartut. Uuliasiorneq kalaallit akisussaaffigaat. Naggueqatigiit Inuit pillugit EU-mi immikkut aalajangersaasoqarnikuuvoq ilaatigut uagut naammassorinngisatsinnik, taamaattumik immikkut aalajangersagaq atorunnaarsikkusupparput. Aammalu piffissami sivitsortumi isumaqarsimavugut nungusaataanngitsumik arfanniarneq, soorlu Kalaallit Nunaanni ingerlanneqartartoq, akuerineqartariaqartoq, Helle Thorning-Schmidt oqarpoq.

Taamaattumik Siumup aamma Socialdemokratit suleqatigiinnissamut isumaqatigiissutaat allanngunngilaq. Socialdemokraatillu qularivallaanngilaat qinersinissami tullermi Siumumit tapersersorneqarnissartik:

- Socialdemokratinik siuttoqarlutik naalakkersuisoqatigiilernissami Issittumut tunngassuteqartut pingaaruteqartut, Siumup pingaartitai, ullumi eqqartorpavut. Taassuma saniatigut isumaqarpugut pingaartorujussuusoq kalaallinut tunngatillugu nalilgiinnermik aamma naligiissitaneq eqqarsaatigalugu suliniarnermi pingaartitassavut, pisinnaatitaaffinnut apeqquteqartut ullumi akissuteqarfigeqatigiissutigalugit suleqatigiissutigeqqissallugit isumaqatigiippugut, Aleqa Hammond oqarpoq.

Siumup Folketingimut qinigassanngortitaa Doris Jakobsen ataatsimiinnermi aamma najuuppoq. Taanna Socialdemokratinik ataatsimeeqateqareerluni aamma eqqissisimanerulerpoq:

- Qulequttat assigiinngitsut, soorlu meeqqat Danmarkimut 1951-imi nuutsitaasimasut, taakku utoqqatserfigineqarnissaat, inatsisitigullu ataataqanngitsut inatsisitigut pitsaasumik sullinneqarnissaat, pitssaumilli atugaqartitaanissaat, Socialdemokratit siulittaasuata sulissutigerusuppaa. Aamma kalaallit Danmarkimi najugaqartut palaseqartitaanikkut pitsaanerusumik atugaqartitaanissaat, Qallunaat Nunaata naalagaaffiata akiligaanik, tamakku tamaasa isumaqatigiissutigineqarput. Taamaattumik suleqatigiinnissamut nutaamut isumalluaqaagut, Doris Jakobsen oqarpoq.

Socialdemokraatip Dan Jørgensenip EU-mi isummertarneri pillugit Socialdemokraatit annertunerusumik qanoq iliorsinnaanatik oqariartuuteqartareersimagaluartut Doris Jakobsenip ernumanartoqartinngilaa:

- Dan Jørgensen assigiinngitsutigut isummersortarpoq. Tamanna soorunami ataqqivarput, partiit iluminni assigiinngitsunik isummersorsinnaammata, kisianni Socialdemokratit siulittaasuata Helle Thorning-Schmidtip tunuliaqutaaniarlutik 100 procentimik uppersarpaa. Taamaammat isumaqatigiissuteqarneq atsioqatigiinnerlu nuannarutigeqaarput, qulakkeerneqarmat Folketingimut iserutta Socialdemokratininngaanniit pitsaasumik tapersersorteqassagatta, Doris Jakobsen oqarpoq.

Meeqqat pinngitsaaliissummik 1951-mi nuutsinneqarsimasut pillugit Siumup pisortatigoortumik utoqqatsertoqarnissaanut piumasaqataanut Socialdemokratit tapersersuipput. Taamatuttaaq aamma Qallunaat Nunaata aningaasalersugaanik kalaallit Danmarkimi palaseqartinneqarsinnaaneranut, inatsisitigut ataataqanngitsut pisinnaatitaaffiisa pitsanngorsaavigineqarnissaanut aamma tapersersuillutik, kiisalu Kalaallit Nunaata pituttorsimanngitsumik (free association) Danmarkimik kattuffeqateqarluni namminiilivinnissaanut tapersersuilluni.Aleqa Hammondip Helle Thorning ataatsimeeqatigereeramiuk Koldingimut ingerlaqqippoq, tassani Socialdemokraatit arnanut ataatsimeersuartitsineranni unnugu saqqummiussissaaq.