Mittarfiit nutaat Siumup siulittaasuanut kinguneqassanngikkallarpoq
Nuummi Ilulissanilu mittarfiit tallineqarnissaannut danskit aningaasaleeqataanissaannut, Kim Kielsen ministeriunermik Lars Løkke Rasmussenimik isumaqatigissuteqarnera Siumumi siulittaasuuneranut kinguneqassanngikkallarpoq.
- Danskit naalaagaaffiata Nuummi Ilulissanilu mittarfinnut aningaasaleeqataaniarnermikkut nunatta namminiilivinnissaa kinguarsalerpaa, nunasiaataanerullu nangeqqiinnarneqarnissaanut aqqutissiuunneqalerluni , Siumut Sisimiut, tusagassiuutinut nalunaaruteqarlutik siullermik taama allapput.
Maannali nipi allanngorpoq,
- Nunatta namminersulernissaannut imaluunniit sutigut allatigut namminersulivinnissamut innarliissappat, Kangerlussuarmullu tunngatillugu soorunami qisuariaateqassaagut arlaannik, kisianni massakkut oqaatigisinnaanngilakka suunersut, Sisimiuni Siumup siulittaasua Dorthea Isaksen taama oqarpoq.
Mittarfissuarnut pilersaarutit piviusunngortinneqarpata, Qeqqata Kommuniani Kangerlussuarmi suliffippassuit annaaneqassapput.
AAMMA ATUARUK Mittarfissualiassat partiimik avissaartitseqqittut
Qeqqata kommuniani borgmesterip tullersortaa siulleq Gedion Lyberth Maniitsoq, ministeriunerup Kim Kielsenillu isumaqatigiissuteqarnerat kinguneqartariaqanngitsoq oqarpoq, kisiannili.
- Naluara kinguneqartitsisoqassanersoq , - kinguneqareerpoq, Naalakkersuisut isareerput, aamma inuiaqatigiinni oqallinneq ingerlaqqissaaq, taava neriuppunga torernerusumik, immikkoortortaqarfiit akuliutsinnerullugit ingerlaqqissasoq, Gedion Lyberth oqarpoq.
Peqataatitaqarnerunissaq oqaloqatigiittoqarnissarlu Siumut sinerissami immikkoortortaqarfiini kissaatigineqarpoq.
- Uivertoqassanngilaq, isumaqatigiinngitsoqarpat eqqissilluni oqaloqatigiinnikkut qaangerneqassapput, Qaqortumi Siumut immikkoortortaqarfiani siulitaasoq Marie Lyberth oqarpoq, taassuma Naalakkersuisut siulittaasuata ministeriunerullu isumaqatigiissuteqarnerat iluarisimaarpaa.
AAMMA ATUARUK USA-p nunatsinni mittarfinnut aningaasalersuinissamut periarfissat misissorniarai
Inatsisartunut ilaasortaq Mala Høy Kúko Tasiilaq isumaqatigiissuteqarnermut tapersersuivoq.
- 1 milliard kronenik sipaarnissaq itigartitsissutigisinnaanngilara, 1 milliard kroner aningaasarpassuupput, 1 milliard kroner uagut kalaallit nammineerluta akiligassarigaluarpagut, sipaarutta uanninngaanniit qujarunnartorujussuupput, Mala Høy Kúko, Siumut sinnerlugu Inatsitsartuut ilaasortaq taama oqarpoq.
Mala Høy Kùkop Siumut siulittaasuata suliaanik iluarisimaarinnippoq, taamaattorli partiip iluani oqaloqatigiittoqarnissaq, Siumut Qaqortumi ujartorneqartoq isumaqatigaa.
Avannaata Kommuniani Siumut sinnerlugu kommunalbestyrelsemut ilaasortap Masauna Holm Petersenip Qaanaameersup, isumaqatigiissutigineqartumut Komunalbestyrelseme Siumup, Atassutip Partii Naleqqallu tapersersuinerat innersuussutigaa.
