Siumut siuariartorpoq. ISUMA-p isumasiuinerata kingullerpaap tamanna ersersippaa.
Inatsisartunut qinersisoqareerpat Siumut arfineq’pingasunik ilaasortaatitaqalissaaq.
Ilaasortaatitassai sapaatip akunnera kingullermit ataatsimik amerleriarput.
Taamaakkaluartorli naliliineq taanna 2002-imi qinersinerup inerneranit ajorseriarneruvoq.
Demokraatit ISUMA-p isumasiuisitsinerani uani sapaatip akunnerani ajorsartuupput, tassa isumasiuineq malillugu ilaasortanngortussaq ataaseq annaassagamikku.
Demokraatilli tassaassapput Inatsisartuni partiit annersaat, tassa qulingiluanik ilaasortaatitaqalissagamik. IA-kkut arfineq’marlunnik ilaasortaatitaqalersussat peqatigissavaat.
Atassut qinersinermi ajorsarujussuartussaavoq. Isumasiuinermi takuneqarsinnaavoq Atassut taamaallaat pingasunik isertitaqassasoq.
Kattusseqatigiit Partiiata ilaasortaatitartik ataaseq tigummiinnassavaat.
Ilaasortanngortussat pingasut suli amigaataapput. Taakku tassaapput aperineqaraangamik akisartut: ”Naluara”.
Qinersisartut 508-it ISUMA-mit aperineqarsimapput. Aperineqartut qarasaasiami net-ikkut e-maililuunniit atorlugu aperineqartarsimapput.
Taakku saniatigut oqarasuaatikkut paasiniaasoqartarsimavoq.
Isumasiuineq nittartakkatsinni malinnaavigisinnaavat, knr naggat gl titarneq uingasoq qinersineq alakkarukku.