Politikki

Siumut: Royal Greenland namminersortunit pigineqalerli

Royal Greenland namminersortunut piaarnerpaamik tunineqarli. Inatsisartut oqaluttarfiannit Siumut taama kissaateqarpoq. Taama Siumup saqqummiussineranut pissutaavoq, Inatsisartuni oqallisigineqarmat Namminersorlutik Oqartussani aktiaateqarluni ingerlatseqatigiiffinni tamakkiisumik ilaannakortumilluunniit pigineqartuni piginnittuunermut tunngasut taakkunanilu ineriartorneq pillug nassuiaat Naalakkersuisut siulittaasuannit saqqummiunneqarmat.

Allattoq Apollo Jeremiassen

oktobarip 13-at 2011 16:43

Siumup politikkikkut oqaaseqartartuata, Karl Lyberthip kissaatigaa Namminersorlutik Oqartussani pigineqartut tamarluinnangajammik namminersortunngorsarneqarnissaat ingammillu Royal Greenland.

- Siumumiit eqqaamagatsigu suliffeqarfissuaq Royal Greenlandi aningaaasatigut ajornartorsiulermat, nunatta karsiata aningaasanik ikiorsermagu. Tassalu taama pisoqaqqinnissaa pinngitsoortinniarlugu piumasaraarput Royal Greenland namminersortunngorsarneqassasoq.
Karl Lyberthip uani pivaa, 2009-mi Royal Greenland nunatta karsianit 250 million koruuninik ikiorserneqarmat aammalu 250 million koruuninik atukkinneqarluni.
- Taamaattumik tamanna peqqinnginniassammat Siumumit piumasaraarput Namminersorlutik Oqartussani suliffeqarfiit pigineqartut namminersortunngorsarneqarsinnaasut, namminersortunit inunnit imaluunniit selskabenit pigineqalerlutik, Karl Lyberth taama oqarpoq.
KNAPK-p ippassaq akerliussutsimik takutitsinermini piumasaraa aalisartunut atugassarititaasut pitsanngorsarneqartariaqartut. Siumumillu tamanna akorneqarpoq oqaatigalugulu Royal Greenlandip namminersortunngorsarneqarnerani aalisartut atugaat pitsanngortinneqassasut.
Suliffeqarfiit Namminersorlutik Oqartussanit pigineqartut sorliit namminersortunngorsarnissaasa misissorneqarnissaat, Inatsisartuni partiinik tamarmiusunit taperserneqarpoq.

Siumut: Royal Greenland namminersortunit pigineqalerli

Aamma atuaruk