Siumut: Qoornumi isumaqatigiissut nakutitsiniarneruvoq
Siumup naalakkersuinermut tunngasunik oqaaseqartartuata Karl Lyberthip aamma partiip aatsitassarsiornermut tunngasunik oqaaseqartartuata Kim Kielsenip naalakkersuisoqatigiit isumaqatigiissutaat, Qoornumi isumaqatigiissummik taagorneqartoq, nakutitsinertut ullumi taavaat. Aamma Demokraatit siulittaasuata Jens B. Frederiksenip isumaqatigiissummut, Siumup ilanngunnissaanik kajumissaarinera naaggaarpaat.
Aatsitassarsiornermi uraanitalinnik piiaanngilluinnarnissamik 1988-imi aalajangiussaq pisoqalisimasoq, Karl Lyberth aamma Kim Kielsen oqarput.
Tamatumunnga atatillugu tikkuarpaat, taamanikkut aalajangiussaq, taamaallaat IA-mit aalajangiusimaneqartoq, Demokraatit pissaanermik tigusiumallutik allatut ajornartumik akuersaagarigaat. Matumanilu naalakkersuisunut ilaasortap Palle Christiansenip KNR-imut oqaasii innersuussutigalugit, taassumami Nunatta aningaasarsiornikkut inissisimanera eqqarsaatigalugu, uraanitalinnik aatsitassarsiunngilluinnarnissamik aalajangiussaq piaarnerpaamik atorunnaarsinneqartariaqartutut taamagu.
Taamatut kajumissaarinera radiukkut ilanngunneqarpoq, Naalakkersuisullu siulittaasuannit Kuupik Kleistimit oqaaseqarfigineqarluni, taassumalu IA-p aamma Demokraatit akornanni tamanna tunngaviusumik isumaqatigiinngissutigineqartoq nassuerutigalugu, taamaattorli naalakkersuisoqatigiit isumaqatigiissutaasa malinneqarnissaat innersuussutigalugit, matumani Qoornumi isumaqatigiissut ilanngullugu.
Jens B. Frederiksenip Palle Christiansenip oqaasiinut akuersaannginnera tassungaannaq killeqanngilaq. Palle Christiansenimmi oqaatsini ilumoorluni oqaatigai, Karl Lyberth aamma Kim Kielsen tusagassiuutinut nalunaarumminni allapput. Taakkulu aalajangiusimavaat, Nunatsinni aatsitassap piiarneqarsinnaasup suulluunniit uraanimik akuata 0,1 procentimik qaffasinnerpaaffilerneqarnissaanik Naalakkersuisut sulissuteqaqquneqarnissaannik, Inatsisartut upernaaru ataatsimiilerpata Siumut siunnersuuteqarniarmat.
