Siumut qineqqusaarutai sassartitaalu saqqummiunneqarput
Inatsisartunut qinersinissamik naalakkersuisut siulittaasuat Hans Enoksen septembarip 15-ianni suaaruteqarmalli ullut 25-it qaangiuttullu Siumut Inatsisartunut qinigassanngortitai partiitullu qineqqusaarutissai ulluup tungaani saqqummiunneqarput.
Siumut Inatsisartunut qineqqusaarutissai qineqqusaartitassaalu ullaap tungaani saqqummiunneqarmata partiip siulittaasua Hans Enoksen ilaatigut taama oqaaseqarluni aammaavoq.
Siumut sinnerlugu inatsisartunut qinigassanngortinneqartut katillutik 61-iupput.
Qinigassanngortittut pingaarnerit tassaapput Inatsisartut siulittaasuat Jonathan Motzfeldt, naalakkersuisut siulittaasuat Hans Enoksen, Siumup Nuummi immikkoortuata siulittaasua Lars-Emil Johansen. Aamma sassarpoq Nuup borgmesteria Agnethe Davidsen.
Siumut sinnerlugu qinigassanngortittut tassa borgmesterertaqarput. Soorlu Uummannap borgmesteria Jens Lars Fleischer Qasigiannguillu borgmesteriat Jess Svane qineqqusaartunut akupput.
Aammali nutaaqarpoq siornagut qineqqusaarsimanngitsumik, tassalu Aleqa Hammond, Uummannameersoq Qaqortumi massakkut najugalik. Aleqa Hammond nunatsinni takornariaqarnermi assigiinngitsutigut ukiuni arlaqalersuni sammisaqartuuvoq, nunanilu allamiut oqaasiinik arlalissuarnik oqalussinnaanini aamma ilisimaneqaatigaa.
Siumut qineqqusaarutaa saakkutsigu tassani anguniagassatut siunniunneqartut malunnarnerupput.
Nunatta namminersulernissaanut suliniuteqarnermi piffissaliussap ataqqineqarnissaa pingaartinneqartariaqartoq Siumumit oqariartuutigineqarpoq.
Tamatuma saniatigut ilinniartitaanerup qaffassarneqarnissaa siunniunneqarpoq, tassani soorlu Sanaartornermut Ilinniarfiup Sisimiuniittup allilerneqarnissaa ilanngunneqarsimavoq.
Meeqqerivitsialaap piviusunngortinniarneqarnissaa aamma siunniunneqarpoq.
Taamatuttaaq meeqqanut pisortat sipaagaqartitsinissaat Siumut IA-llu naalakkersuisooqatigiinnerminni avissaarutaat Siumumit aamma aalajangiussimaneqarpoq.
Siumut qinigassanngortitai KNR-ip internettikkut nittartagaani piffissaq sivisunngitsoq qaangiuppat takuneqarsinnaalissapput.
