Siumut qineqqusaarutaa pingaarnersiorlugu
Siumut qinersinissamut atatillugu partiitut qineqqusaarummini arlalinnik siunniussaqarpoq. Piviusut tunngavigalugit anguniakkani pingaarnerit suunersut Partiip politikkikkut siulittaasup tullianut Jonathan Motzfeldtimut apeqqutigaavut.
- Manna tikillugu Siumut aamma pitoreernikuuvoq, soorlu Namminersulernissap kinguarsarneqarani naammassiniarnissaanut atatillugu, tamatumunngalu atatillugu anguniarneqartariaqarpoq Kalaallit Nunaata Danmarkillu aningaasatigut nammaqatigiilernissaasa aaqiivivigineqarnissaat, Jonathan Motzfeldt oqarpoq.
Inuussutissarsiornikkut siuarsaanermi periarfissat naammassiniarneqarnissaat, meeqqat angerlarsimaffiillu nunatsinni nukittorsarneqarnissaat Siumumit pingaarnertut aamma siunniunneqarput. Kiisalu ilinniartaanerup aamma nukittorsaaqarnissaa siunniunneqarluni. Tamatumani takussaasut eqqarsaatigissagaanni Sisimiuni Sanaartornermut Ilinniarfiup allilerneqarnissaa Siumumit aalajangiussimaneqartoq Jonathan Motzfeldt oqarpoq.
- Tamatumuuna assassornikkut teknikkikkut allatigullu ilinniarsimasunik nunatta peqalernissaa anguniagaavoq.
Siunissaq qaninnerusoq eqqarsaatigalugu allatigut piviusunngortitsinissamik Siumut aamma siunniussaqartoq Jonathan Motzfeldt oqarpoq.
- Maani piginneqatigiilluni namminerlu illuliortoqartarpoq, kisiannili pisortat tassa Namminersornerullutik Oqartussat kommunellu inissanik amerlanerusunik sanaartortariaqarput, innuttaasut inissamik pisariaqartitsisut tamarmik inissaqarnissaat naammassineqarsinnaasariaqarmat. Isumaqarpunga tamanna siunissami sakkortuumik ornittariaqaripput, anguniartariaqarlugulu.
Partiit tamavimmik meeqqat inuusuttuaqqallu atugarissaarnerulernissaannik anguniagaqarnissaq isumaqataaffigaat. Tamatuma saniatigut pisortat meeqqanut immikkut ittumik sipaagaqartitsisalernissaat Siumumit immikkut suli aalajangiussimaneqarpoq.
- Tamanna naalakkersuisunngortitsinissami isumaqatigiinniutissatut Siumup nerriviup qaanut aamma iliniarpaa.
Naalakkersuisuni ilaasortat ilassinnissutinik atuisarnerannut tungasunik sooruna
Siumut qineqqusaarutaanniittoqangitsoq, tamatumunnga Jonathan Motzfeldt ima akivoq:
- Suliat taamaattut maannakkut ingerlareersut aaqqiiviginiarneqartullu maannakkut qineqqusaarutigissallugit uanga tunngavissaqarsorinngilakka. Pineqartut aaqqinniarlugit iliuusissat naammattut tikkuartorneqareerput qularutiginngilaralu naammassineqarumaartut.
