Siumut Qaqortumi mittarfiliortoqarnissaanut tapersersuivoq

Timmisartunut suluusalinnut Qaqortumi mittarfiliortoqarnissaanik angallanneq pillugu isumalioqatigiitsitat inassutaat, Siumup Qaqortumi immikkoortoqarfiata isumaqatigaa.

Taamaaliorneq inuiaqatigiinnut pitsaanerpaamik angusaqarnerussasoq, Siumup immikkortoqarfianeersut allapput.

- Sanaartorneq annertooq Kommuni Kujallermut tamarmut aningaasatigut akileraarutitigullu annertuumik iluaqusiissasoq, Siumut Qaqortoq isumaqarpoq.

Aamma timmisartunut suluusalinnut Qaqortumi mittarfeqalerpat inuussutissarsiutinik ineriartortitsineq sukkatsinneqassasoq, partiip Qaqortumi immikkoortoqarfia tikkuaavoq.

- Eqqaamassavarputtaaq, Kujataata nersutaateqarnikkut, naatitsinikkut nerisassaqarnikkullu pilersuisuunera ukiuni aggersuni ima annertutigilerumaartoq, nunarput tamaat pilersulissallugu.

Suluusalinnut Qaqortumi mittarfiliortoqarpat, Nanortalimmiut aamma akikinnerusumik sivikinnerusumillu angalasinnaalissasut, Siumup immikoortoqarfiata tamanna ilimagaa.

Siumut Qaqortup taamaalilluni Kommuni kujallermi angallannermut ataatsimiititaliaq akerlilerpaa, tassanngaanniit oqarmata, Qaqortumi suluusalinnut mittarfiliortoqarpat, tamanna kujataani takornariaqarnermut pitsaanngitsumik kinguneqassasoq.