Siumut Qaasuitsup Kommuniani kisimiilerpoq
Tassalu partii Qaasuitsup Kommuniani borgmesteriutitaqartoq, Siumut, kisimiilerpoq.
Inuit Ataqatigiit Siumullu Qaasuitsup Kommuniani suleqatigiikkaluarput.
Kisianni Kommunalbestyrelsep ataatsimiinnerani kingullermi, aappaagu 2011-mi missingersuummik aalajangiiffiusumi, Inuit Ataqatigiit Siumumik suleqateqarnertik kipitippaat.
Partiit maanna suleqatigiilersut ilaasortatitaat aqqanillit taasinerisigut, Qaasuitsup Kommuniani aappaagu akileraarutissaq procentimik ataatsimik qaffanneqarpoq, partiit sisamat isumaqarmata, missingersuutit nammaqatigiissappata tamanna pisariaqartoq. Siumup ilaasortaatitai qulit akerliullutik taasipput.
Qaasuitsup Kommuniani Siumumi gruppip siulittaasua, Palle Jeremiassen, tamatumunnga atatillugu oqarpoq, akileraarut qaffaqqunagu sipaarfissanik namminneq innersuussuteqarsimagaluarlutik.
Inuit Ataqatigiit, Kattusseqatigiit Partiiat, Atassut kiisalu Demokraatit suleqatigiinnissamut isumaqatigiissutaat aqqaneq marlunnik immikkoortortaqarpoq.
Immikkoortoq siulleq kommunimi aningaasaqarneq imminut nammassinnaasunngorteqqinneqarnissaanik qulequtaqarpoq, aammali assersuutigalugu suliffissaaleqineq annikillisarniarneqassalluni.
Naak Jess Svane kommunalbestyrelsemi amerlanerussuteqartunit tapersersorneqanngikkaluarluni, qinersinissap tulliata tungaanut borgmesteriuinnarsinnaavoq. Kisianni partiit sisamat suleqatigiinnertik taamaatingippassuk, Siumup politikkini kommunimi tassani ingerlassinnaanngilaa, amerlanerussuteqartulli politikkiat malittariaqarlugu.
