Siumut: Pisortat naliliinissamut aningaasaleeqataasariaqarput
Siunnersuut akuerineqarpat angallatit sillimmaserneqanngitsut nalilersorneqarnissaannut atatillugu aningaasartuutit aalisartut nammattussanngussavaat, Siumulli oqaatigaa pisortat tassunga tapiisinnaasariaqassasut, aningaasartuutissallu annertussusissaat nalilersorneqarsinnaallutik.
Aalisariut Upernavimmi inissisimasoq, Siumup oqaaseqartitaata Karl Lyberthip assersuutigaa:
- Taanna nalilersorneqassappat, nalilersuisussap suminngaanneernera soorunami apeqqutaalluni, soorlu Nuumminngaanneersinnaavoq Danmarkiminngaanneersuulluniluunniit, tassunga aningaasartuutit amerlasoorujussuusinnaasut kialluunniit takorloorsinnaavaa, Upernavimmukarluni nalilersuissaguni. Taamaattumik pissutsit taamaattut eqqarsaatigalugit isumaqarpugut Inatsisartuni nalilersorluartariaqaripput ilumut aalisartup aninagasartuutit kisimiilluni akilissanerai, Siumup aalisarnermut tunngasunut oqaaseqartittagaa Karl Lyberth oqarpoq.
Aalisarnermulli, Piniarnermullu Nunalerinermullu Naalakkersuisup Ane Hansenip Karl Lyberthimut akissuteqarnermini ilaatigut oqaatigaa ajornartorsiut taanna annertuutut nalilerneqartariaqanngitsoq, sinerissami tamani naliliisinnaasunik sillimmasiisinnaasuinillu peqartoqarnerarlugu.
Angallatit illoqarfinni nunaqarfinnilu assigiinngitsuni uninngaannalersimasut nalilersugassanut ilanngunneqarsinnaannginnersut Siumut aamma isumaqarpoq:
- Angallatit arlallit illoqarfinni nunaqarfinnilu uggornaraluartumik uninngaannartut angalagaangatta takusarpavut, ukiorpaaluit ilaatigut uninngaannartarlutik. Inatsit una malillugu taakkua periarfissaqannginnerat uggornartutut isigivarput. Taakkua aamma nalilerneqarsinnaasariaqartut Siumumit isumaqarpugut, Karl Lyberth, Siumumeersoq oqarpoq.
Aalisarnermut Piniarnermullu Naalakkersuisoq Ane Hansen ima akivoq:
- Nunatta karsia akissaqarnerusuuppat soorunami taakku sukkanerusumik ilanngunneqarnissaat kissaatiginaraluarpoq, kisianni aningaasaqarnikkut pissutsit taamaakkallartillugit aalisartut sukkanerusumik naleqqussarnissaannut massakkut periarfissat salliutippavut, Aalisarnermut, Piniarnermut Nunalerinermullu naalakkersuisoq Ane Hansen taama oqarpoq.
Siunnersuut Aalisarnermut, Piniarnermut Nunalerinermullu ataatsimiititaliami ingerlateqqinneqarpoq, oktobarillu 20-ani aappassaaneerneqarnissaa siunniunneqarluni.
