Siumut Paamiut nalileeqqeqqusivoq
Simon Olsenip Aningaasaqarnermut Ataatsimiititaliami siulittaasunngortinneqarnera Siumut siulersuisuunerisa Inatsisartunilu Siumumi ilaasortat nalilersoqqittariaqaraat, Paamiuni Siumut immikkoortortaanit maanna kissaatigineqarpoq.
Paamiuni Siumup immikkoortortaqarfia ilaasortaminik ataatsimiititsereerluni, ilaasortat Simon Olsenip inissinneqarnera akuerisinnaanngilaat, kajumissaarutigaallu siulersuisuunerit inatsisartunilu siumumi ilaasortat nutaamik naliliisariaqartut kisalu aningaasaqarnermut ilaasortani illuatungiliuttut akuerisinnaasaannik inuttaliinissaq pisariaqartoq.
Paamiuni Siumumi ilaasortat isumaqarput Simon Olsenip Naalakkersuisunit tunuartitaariarluni Ataatsimiititaliami siulittaasunngortinneqarnera pissusissamisuunngitsoq. Kunnak Lorentzennip aamma oqaatigaa allakkanik ammasunik allattariaqarnermut tunngavigigitsik nassuiaammik qullersaqarfimminngaanniit siusinnerusukkut tigusaqarsimannginnamik aamma isumaqarpoq matoqqasumik eqqartuisimaneq sineriammi Siumukkormiunut aalassatsitsisoq.
Aniingaasaqarnermut Ataatsimiititaliami siulitaasumik toqqaasimaneq allanngungaartussatut Kunnak Lorentzen isumaqanngilaq, aatsaalli Siumut februaarimi ataatsimeersualerpat sammineqangaatsiarnissaa ilimanarluni.
