Siumut: Paamaarussineq naammaginanngilluinnaqqissaarpoq
Siumup siulittaasua Naalakkersuisunut isornartorsiuisunut maanna ilannguppoq.
Qaasuitsup Kommuniani sanaartugassatigut ajornartorsiutit pillugit, borgmester Jess Svanep oqarnera naapertorlugu ilatigut Namminersorlutik Oqartussani allaffissornikkut suliassanik akuersissutigineqartussanik kommunimilu sanaartugassanut qinnuteqaatinut paamaarussinerujussuarmut tunngatillugu Naalakkersuisut sulisimanerat taassuma naammaginngilluinnaqqissaarpaa.
Ernummateqarneq Qanoruumi Radioaviisimilu Jess Svanemit ippassaq unnukkut oqaatigineqartoq. Maannakkullu tassa Aleqa Hammondimit taperserneqartoq.
- Taamatut nalunaaruteqarnermut Siumut paasinnilluarpoq, tamaattumillu tamakkiisumik tapersiuteqarnini maanna nalunaarutigalugu, tusagassiuutitigut nalunaarummi Siumup siuttua allappoq.
- Inuiaqatigiinni sanaartortuerukkaangat inuussutissarsiuteqarneq unittarpoq suliffissaaleqinerlu annertuseriartarluni. Tamanna ajorluinnarpoq pimoorullugulu aaqqinniartariaqarluni. Taamaattumik Siumumiit Naalakkersuisut kaammattorneqarput sullarinnerulaaqqullugit kommunimullu isumaqatigiisutaasimasut eqquutiteqqullugit, nangilluni oqarpoq.
Aammaattaaq Naalakkersuisut tulleeriiaaneri unittoornermik suliffissaaleqinermillu kinguneqartartut nammineq taama isumaqarluinnarluni, Aleqa Hammondip naqissuserpaa.
