Siumut Nuuk: Unioqqutitsisoqartarsimanersoq misissorneqarli!
Inatsisartuni taasisitsisoqartillugu unioqqutitsisoqartarsimasinnaanissaanut tunngasoq isertuaatsumik unneqqarissumillu inatsisartut siulittaasoqarfiannit misissorneqartariaqarpoq. Taama isumaqarpoq Nuummi Siumup immikkoortortaqarfiani siulittaasoq Kim Godtfredsen.
Allattoq Louise M. Kleemann
novembarip 18-at 2008 08:02
Kim Godtfredsen isumaqarpoq partiit allat pisumut tunngatillugu oqariartuutaat sakkukippallaartut, taamatuttaaq Inatsisartut siulittaasuat, Ruth Heilmann ersarinnerussumik qisuariaateqartariaqartoq, Kim Godtfresen isumaqarpoq.
- Pisoq ilungersunarpoq, tamannalu Kalaallit Nunaata avammut isigineqarneranut innarliisinnaavoq, taamaattumik iternga tikillugu isertuaatsumillu misissorneqartariaqarpoq, Kim Godtfredsen isumaqarpoq.
Taasisitsisoqarnerani unioqqutitsisoqartarsimanersoq pillugu pisoq ilungersunartutut isigineqarmat sukumiisumik misissuisoqartariaqarnertoq Inatsisartuni ilaasortaq, Jonathan Motzfeldt aamma Folketingimilu ilaasortaq, Lars-Emil Johansen, piumasaqareerput.
