Siumut Nuuk: Siumut aqunneqarnera pitsaanngilaq

Aalisarnermut Naalakkersuisup Rasmus Frederiksen-ip tunuarnera Siumut sinerissami immikkoortortaqarfiini arlalinni suli isummerfigineqanngilaq. Immikkoortortaqarfiit ilaat ataatsimiinngikkunik ataatsimeereerput, tassa Sisimiuni Uummannamilu.

Nuummi Siumut immikkoortoqarfia tallimanngorpat ataatsimiissaaq, tamannali sioqqullugu siulittaasua Lars-Emil Johansen naalakkersuinikkut kingullertigut pisut tunngavigalugit uparuaavoq:

- Ilungersunartutut aamma kipiluttunartutut nalilerpakka, taamaattumik Siumut Nuuk siulersuisui tallimanngorpat ataatsimiissapput.

Siumut Nuup siulersuisui ataatsimiilerunik naalakkersuinikkut pisut kingulliit oqaluuseriniarpaat.

- Iliuuseqarsinnaanerput siunnersuuteqarsinnaanerput aaqqiissuteqarsinnaanerpullu anguniarniarparput.

Qinersinissamik suaarutiginnissinnaaneq aamma periarfissaasoq Lars-Emil Johansen oqarpoq.

-Uanga nammineq isumanga malillugu periarfissat ilagaat. Maannakkut pissutsit aaqqinneqarsinnaanngippata, naalakkersuisunik piukkunnartunik nassaartoqarsinnaanngippat imaluuniit toqqaanissaq tunuarsimaarfigineqartuaannassappat, qinersisoqarsinnaanera mattunneqarsinnaanngilaq.

Naalakkersuisut siulittaasuata Hans Enoksen-ip naalakkersuisoqarfiisa amerlinerat Lars-Emil Johansen-ip eqqarsarnartoqartillugulu isoraa.

- Naalakkersuisuni siulittaasuusimavunga, naalakkersuisullu siulittaasuata suliassai nalunngilakka. Naalakkersuisut siulittaasuata suliassaqarfinnik ataasiakkaanik immikkut ingerlatsisuunera tulluartutut isumaqarfiginngilluinnarpara, nuna tamakkerlugu naalakkersuisuni siulittaasutut ingerlatsinissaminut naammattumik periarfissaqangimmat.

Naalakkersuisut siulittaasuata naalakkersuisuni ilaasortassarsiortarneranut partii naalakkersuisooqataasut aalajangeeqataasalernissamik piumasaqarnera akuersaarneqarsinnaanngilluinnartoq Lars-Emil Johansen oqarpoq.

- Siumutoqqatut, siutinnut tusarniitsumik ippassaq tusagaqarpunga. Siumut naalakersuisoqatiminit piumaffigineqalerpoq, Siumukkormiut naalakkersuisuni ilaasortassaat Inuit Ataqatigiinnit akuerineqaqqaartassasut.

- Taamatut ingerlatsisoqarsinnaanngilaq.

- Siumulluunnit partiiata iluani akuersissutigineqarneq ajortut Inuit Ataqatigiinnut akuerisassanngortinneqarsinnaanngillat.

- Naalakkersuisoqatigiinni pissutsit aaqqinneqarsinnaanngippata qinersineq kisimi periarfissaavoq, Lars-Emil Johansen oqarpoq.

Nuummi Siumup immikkoortuata siulittaasua aperineqarami Siumut sanngiilliartuinnarnersoq ima akivoq:

- Maannakkut Siumut aqutsinera kusananngilaq. Kisianni Siumut ataatsimut isigalugu sanngiilliartortutut oqaatigeqarusunngilluinnarpara. Siumut iluani periarfissarpassuaqarpoq, ajunngitsumik ingerlatsisinnaasunik maannakkullu ingerlatsineq uanga isumaqatigisinnaanngilara.

Tamaattorli Siumut avissaartuutilinngitsoq Lars-Emil Johansen erseqqissaavoq. Sisimiuni Uummannamilu Siumup immikkoortortai ataatsimiissimanertik pillugu kingusinnerusukkut oqaaseqarusupput.