Siumut: Nukissiuutinut nutaanut aningaasanik atorniarniarta
maajip 18-at 2006 05:44
Nunatsinni innuttaasut 95 procentiisa ukiut tulliuttut 20-t qaangiutsinnagit nukissiuutinik uuliamik atuiffiunngitsunik pilersorneqalereersimanissaat, inatsisartuni ippassaq ataatsimiinnermi Siumumeersup Ruth Heilmann-ip Naalakkersuisunut anguniaqquua.
- Taamaaliunngikkutta akissaqanngilagut. Taamaaliortariaqarpugut, peqqutigalugu uulia akitsoraluttuinnarmat. Taamaattumik pisuussutigut atorluartariaqarpagut. Utaqqinata aallartittariaqarnerput naalakkersuisunut kaammattuutigivarput. Aamma ilisimalereerparput, nunarput ima nukissiutaasinnaasunik pisuussuteqartigisoq, allaat nukissiuutinik nunanut allanut uuliamut taartaasinnaasunik tunisassiorsinnaalluta. Taaneqarsinnaasunut ilaapput brinti.
