Siumut: Missilinut illersuut iluatsinngilaq
Nunatta Amerikamiut missilinut illersuusiornerannut nunatamik atugassiinermigut pissarsiai sulluginarluinnarluinnartut atuarlugu ajorluinnarpoq, Siumup inatsisartuni ilaasortaatitai taama allapput, 2004-imilu USA-mik suleqateqarnissamut isumaqatigiissummut innersuussillutik.
Josef Motzfeldt, IA, taamani nunanut allanut attaveqarnermut naalakkersuisuusoq USA-mi nunanut allanut ministeri, Colin Powell, taamani atsioqatigaa.
Amerikamiut akiliinikippallaarsimasut Siumukkormiut maanna isumaqalerput.
-Kalaallit ilinniartut USA-mi ilinniarfissarsisineqarnissaat anguneqanngilarluunniit. Ukiut arfinillit ingerlareersullu kalaallit Amerikamiullu pituttuinngitsumik taamaallaat suleqatigiilerput paasisassarsiorlunilu angalanerit marlussuinnaat akilersinneqarsinnaasimallutik, Siumukkormiut taama isumaqarput.
Pituffimmi sakkutooqarfiup missilinut illersuusiornermut atatillugu nutarsarneqarnissaa unitsinneqarallartariaqartoq Siumup maanna piumasaraa.
-Amerikamiut nunani allani sakkutooqarfiliisarneranni nunat tamakku annertuumik pissarsiaqaatigisarpaat. Paasisassarsiorluni angalanermik akilerneqalaaginnarneq videomillu aqqusiilaaginnarneq naammaginanngilaq. Naalakkersuisut tigussaatunik piumasaqartariaqarput – soorlu Kalaallit Nunaata imartaani nunanit tamaneersut mingutsitseratarnissaannut sillimaniarnermut piareersaatit USA-p sakkutooqarfeqarnerminut akiliutigisariaqarpai. Pituffimmi piffissap ingerlanerani mingutsitsisimanermut tunngatillugu tamanna aamma taarsiissutitut isigineqarsinnaasoq Siumup inatsisartuni ilaasortaatitai isumaqarput.
USA taamatut aaqqiinermut peqataarusunngippat taava dollarinik akiliisariaqarput suleqatigiinnissamik tutsuigineqarsinnaanngitsumik isumaqatigiissusiuinnarnatik ilinniartullu inissaannik neriorsuuteqaannarnatik, Siumut naggasiivoq.
