Siumut malunnaatilimmik siuariarpoq

- Kisitsisit Siumup siuariarneranik takutitsipput, aamma tamanna naatsorsuutigereerparput. Aamma nuna tamakkerlugu siuariarnerput tulluusimaarutigaara, taasinerilli amerlanersaat suli kisinneqarsimanngillat, illoqarfiillu anginerit angunissaat pissanganassaaq, taakkunani aamma siuariarsimanersugut pissanganassaaq. Nunarpulli tamakkerlugu siuariarnissarput suli upperaarput. Taamaammat anguasarput tulluusimaarutigaarput, Vittus Qujaukitsoq oqarpoq.

Taama siuariartiginertik nunatsinni siuttunngornissaminnut atorsinnaanerlugu Vittus Qujaukitsup oqaaseqarfigissallugu mianersuutilaarpaa:

- Soorunami maannakkorpiaq taasinerit tamakkerlugit kisinneqarsimatinnagit tamanna oqaaseqarfigissallugu mianersuutigisariaqarparput.

Partii nutaap, Partii Inuit, ataatsimik marlunnilluunniit ilaasortaatitaqalertussatut sikkoqarput, siulittaasorlu isumalluartoq knr.gl-imit oqaloqatigaarput:

- Kisitsisit taamatut ingerlaannassappata isumalluarnissamut pissutissaqarpoq, taamaammat aap pissangaqaagut, siulittaasoq Nikku Olsen oqarpoq.

Partii Inuit qaammatit marluk inorlugit pisoqaassuseqarpoq, Nikku Olsenillu partiip sumiiffiit ilaanni partiitoqqanit taaguunneqarnerusimanera nuannaarutigalugulu tupaallaatigisimavaa:

- Nuannaarpugut, aamma qinersisarfiit ilaanni partiinit allanit amerlanerusunik taaguunneqarsimanerput tupaallaatigaarput. Qaammatit marluk ataallugit pisoqaassuseqaannarpugut, taamaammat angusarput naammagisimaartupilussuuarput, siulittaasoq Nikku Olsen oqarpoq.