Siumut: Kuupik iliuuseqartariaqalerpoq
Iluarsiissutit ungasinnerusoq isigalugu isertitassanut tunngavissanik ajornerusunik, aamma inuiaqatigiit ataatsimoortumik aningaasaqarniarnerannik ajornerulersitsussat. Namminersorlutik Oqartussat Air Icelandimik isumaqatigiissuteqarnerat, aamma naalakkersuisup Palle Christiansenip suliamik suliarinninnera, Karl Lyberthip pivai. Naalakkersuisut siulittaasuat, Kuupik Kleist, Karl Lyberthip iliuuseqartariaqalersoraa.
- Allaat oqartussaaqataasitsilluni aalajangiisarnerit ingerlannerini innuttaasut soqutigisaqaqatigiillu akuliutsinnissaat toqqarneqarneq ajorpulluunniit, Namminersorlutik Oqartussat tusarniaasarneri tamanut tunngatillugu qallunaatut ingerlanneqartarmata. Tamassumunnga peqqutaavoq, Namminersorlutik Oqartussat qitiusumik aqutsisoqarfianni atorfiit inuttaqanngitsut kalaallit aviisiitigut inuttassarsiornissaat ingerlanneqartassanngitsoq Naalakkersuisut toqqarmassuk. Taarsiullugu qallunaat aviisiitigut aamma internetsikkut inuttassarsiortarfiisigut qallunaanik sulisussarsiortoqartarpoq, taamaattumillu atorfiit qallunaanik misilittagaqanngitsunik, aamma kulturitsinnik nunatsinnilu pissutsinik ilisimasaqanngitsunik inuttalersorneqarlutik, nunatsinni oqartussaaqatigiinnerup amigalernera malitsigitillugu - nunatsinni namminersorluni oqartussaanerup eqqunnerani anguniagaagaluit killormoorlugit, Karl Lyberth oqarpoq.
Aamma oqarpoq, naalakkersuisut politikkerinnguatsiaraat namminersorluni oqartussaanerup siuarsarnissaata unitsinnissaa, illoqarfinni suliffeqarfiit innuttaasullu aningaasartuuteqarnerulersillugit, kiisalu suliffissaaleqineq malitsigitillugu. Taamatut politikkeqarnerup piffissap sivikitsuinnaap ingerlanerani ukiuni kingullerni 30-ni ineririartortitsinerit angusallu tamakkerlugit sapangersippai.
- Siumup siunissamut takorluugaa tassaavoq Namminersorluni Oqartussaaneq piviusunik imaqartoq annertussuseqartorlu angussallugu, Karl Lyberth erseqqissaavoq.
- Tamassumani tunngaviusariaqarpoq ataatsimoorluni tamaviaarneq suleqatigiinnerlu, inuiaqatigiinnut kalaallinut tamarmiusumut iluaqutaasussamik, tassani illoqarfigisatsinni nammineerluta suliffeqarfiutigut sulisussaasugullu nunatta aningaasatigut uagut nammineq piumasagut tunngavigisagullu atorneqassallutik.
- Taarsiulluni Naalakkersuisuni ilaasortaasut misigisaqarfigaagut, tamanit takuneqarsinnaasumik aqutsisoqaratik akerleriittut, taamatullu Air Icelandimik isumaqatigiissuteqarnermi Palle Christiansenip atorfimminik atuinera, aamma suliamik suliarinninnera, pillugit Aningaasaqarnermut ataatsimiititaliap isornartoriuinera tusaanngitsuusaarneqarluni, Siumup politikkikkut oqaaseqartartua oqarpoq.
