Siumut Kommuneqarfik Sermersuumi missingersuusioqatigiinnissamut ukiup appaassaa peqataanngitsoq
Kommuneqarfik Sermersuumi aappaagumut aningaasaqarnermut missingersuutit kommunalbestyrelsimi amerlanerussuteqartut isumaqatigiissutigaat.Partiili ataaseq isumaqatigiissummut atsioqataanngilaq.
- Uagut isumaqarpugut, taamatut missingersuutit pillugit isumaqatigiinniarnerup ingerlarnga naammaginanngitsoq, Kommuneqarfik Sermersuumi Siumup gruppemi siulittaasua Peter Davidsen oqarpoq.
Kommuunip aappaagumut aningaasanut missingersuutai Inuit Ataqatigiit, Demokraatit Suleqatigiisitsisullu isumaqatigiissutigaat.
Isumaqatiginninniarnermili Siumut peqataatinneqarluarsimanngitsoq Peter Davidsen isumaqarpoq. Taamaammat isumasioqatigiinnissamut piumasaqarsimagaluarput.
- Susassaqartut tamaasa isumaqasiortinneqassasut kommunilu saqqummiilluni suleriaaseq qanoq ittoq, itigartippaat. Tamanna immaqa matoqqanermik aallaaveqarsimassasoq nalilertariaqassavara maannakkut, Peter Davidsen oqarpoq.
AAMMA ATUARUK Kommuneqarfik Sermersuup aningaasaliissutissat isumaqatigiissutigigai
Borgmesterip isornartorsiuineq akerlilerpaa
Isornartorsiuinermut borgmesterip Inuit Ataqatigiinneersup Charlotte Ludvigsenip isumaqataaffiginngilaa.
- Siumukkut aggersareeraangakkit partiit aamma allat aggersartarpakka. Tamarmik assigiimmik uani sullinneqarput, taamaattumik uani isornartorsiutaat isumaqarpunga eqqunngitsoq, tamarmik assigiimmik periarfissaqarnikuugamik, soorunami partiinut ataasiakkaanut nammineq aallaaviuvoq taanna akuerissanerlugu akerissannginnerluguluunniit.
Siumut arlalinnik isumaqatiginninniutissaminik saqqummiussisimagaluarpoq. Tasiilami naluttarfittaarnissaq, Ittoqqortoormiini katersortarfik Paamiunilu tasiusannguup tungaanut aqqusinniornissaq piumasaqaataanut ilaallutik.
AAMMA ATUARUK Kommuneqarfik Sermersuup aappaagumut missingiutaa isumaqatigiissutigineqartoq
Siumup piumasaqaatai kommunalbestyrelsimi eqqartorneqareersimasut Charlotte Ludvigsenip KNR-ip paasissutissiissutigai.
Kommuunit aappaagumut aningaasaqarnermut missingersuutai itisilerneqanngimmata Siumumit akuersissutigineqassanersut itigartitsissutigineqassanersulluunniit suli aalajangerneqanngitsoq Siumup paasissutissiissutigaa.
