Siumut kinguaassiuutitigut innimiilliortoqannginnissaanut periusissiortoq
Arnat Siumumut attuumassutillit attuumassuteqarsimasullu qulit allattaanerisimasaminniit killiminnik qaangiiffigineqarsimallutik siulersuisuunernut nalunaaruteqarneranniit ukioq ataaseq qaangiutilerpoq.
Sulinermi toqqissisimasumik avatangiiseqarnissaq naqitatut allaqqareeraluartoq suli ersarinnerusariaqalersimasoq partiip siulittaasua naqissusiivoq.
AAMMA ATUARUK Siunnersuisoqatigiit arnanut nersualaarinnittut
- Nuna tamakkerlugu ataatsimeersuaqqammerpugut, tassanilu aalajangerneqarpoq sulinermut politikkimik ersarissaasoqassasoq, tassanilu nikassaanerit killissamillu qaangiinerit ersarissarneqartariaqarneri naqissuserneqarlutik taannalu aallaavigalutigu siulersuisut suliaqarpugut, Erik Jensen KNR-imut oqarpoq.
Akuersaanngikkaat
Partii sulinermut politikkimik siornatigulli peqarpoq, tassanili kinguaassiuutitigut innimiilliornermut tunngasut ersarippallaarsimanngitsut siulittaasoq oqarpoq.
AAMMA ATUARUK Partiimi allattaanerusimasoq pineqaatissinneqarsimasunut inissiisarfimmiittussanngortoq
- Partiitsinni kikkulluunniit qanorluunniit toqqissisimanissaat, qinigaappata sulisuuppataluunniit qulakkeerniarlutigu suliat ingerlappagut. Aamma killissamik qaangiinerit akuersaarneqannginnerat naqissuserneqarnikuuvoq, Erik Jensen oqarpoq.
Oqarusunngitsut
Periusissiaq piareerpat tamanut saqqummiunneqarumaartoq taanna aamma oqarpoq.
Periusissiap imai pillugit siulittaasoq oqaaseqarusunngilaq, partiillu allaffeqarfianut innersuussilluni.
AAMMA ATUARUK Kommuni: Nikanarsaalluni tiingaffiginninnermut tunngasuni politikkiliorpugut
KNR partiip allaffeqarfianut paasiniaavoq, taakkuli nittartakkaminni saqqumminnginnerani periusissiaq sunik imaqarnersoq oqaatigiumanngilaat.