Siumut isumaqatigiinngitsut
Inatsisartut tusagassiuuteqarneq pillugu ippassaq oqallinneranni paasinarsivoq Siumut partii sinnerlugu Inatsisartuni ilaasortaatitat akunnerminni isumaqatigiinngissuteqartut.
Siumut sinnerlugu oqaaseqartitap Doris Jakobsen-ip parteeqatimi Per Rosing Petersen-ip siunnersuutaa, KNR-imi kalaallisuinnaq nutaarsiassaqartalernissaanik imaqartoq, iluarisimaarpaa oqarluni tamanna kalaalinngorsaanermut atassuteqarmat Siumumit pingaartuutinneqartoq.
Siumulli oqaaseqartitaata saqqummiussaa parteeqataasa tamarmiullutik tapersersunngikkaat paasinarsivoq, Jonathan Motzfeldt Inatsisartut oqaluttarfianut qaqimmat.
Nunarput naalagaaffeqatigiinnermut suli atammat nunatsinnilu innuttaasut 20 %-ii qallunaatut oqaaseqartuummata nutaarsiassat taamaasillutik aamma qallunaatuujusariaqartut, Jonathan Motzfeldt oqarpoq. Jonathan Motzfeldtip erseqqissarpaa nammineq parteeqatimilu arlaqartut Inuit Ataqatigiit oqaaseqartitaata saqqummiussai isumaqatiginartikkitik. Inuit Ataqatigiit isumaqarput qallunaatut nutaarsiassaqartitsisarneq peerneqassanngitsoq.
