Siumut: Isertitsiveqalernissamut aningaasat apeqqutaanngillat
Nunaqarfinni nutaanik isertitsiviliortoqarnissaa aningaasanik asuleernerusoq politiit oqareersullu taama oqarpoq
- Tupingusuppunga oqartoqarsinnaasoq, aningaasat asuli atugassiissutigineqassasut, taamannak isertitsiviliortoqassappat nunaqarfinni. Apeqqutaanngilaq uani innuttaasut qanoq amerlatiginersut amerlatiginngitsulluunniit. Isumaqarpunga, naapertuilluartumik inatsisitigullu illersorsinnaasumik atugassiisuteqarnissaq uani apeqqutaali.
Nunaqarfinni maanna isertitsiveqanngitsuni nutaanik isertitsiviliortoqarnissaa aningaasanik asuleernerusutut Kalaallit Nunaanni politimesterip oqaatigereeraalu, Siumut folketingemut ilaasortaatitaa, Aleqa Hammond, oqarpoq.
Kommunefogedit nunaqarfinnilu innuttaasut allatulli atugassaqassasut Aleqa Hammond isumaqarpoq.
- Isumaqarpunga pingaaruteqartorujuussuusoq, innuttaasunut atugassiissutigineqartussat - sumiikkaluarpataluunniit aammalu atugassiissutit qanoq ikkaluarpataluunniit - naapertuilluartut aammalu innuttaasunit pisariaqartinneqarnissaannut aamma piareersimasuusut aammalu ullutsinnut ataqqinassuseqartumik inatsisinik atortitsinermik atugassiissuteqarnissaq pingaarnersaassasoq.
Aamma atuaruk Nunaqarfinni isertitsiveqalernissaq politiinit taperserneqanngilaq
Pisariaqartitsisoqarnersoq misissuiffigeqqaarusuppaa
Folketingemi Kalaallit Nunaannit ilaasortaaqataata, Aaja Chemnitz Larsenip Inuit Ataqatigiinneersup, politimesterip Bjørn Tegner Bayip taama oqarnera tupigaa:
- Paasissutissat, politimesterip siusinnerusukkut ataatsimiinnermi, justitsministerip peqataaffigisaani uagullu aamma peqataaffigisatsinni, saqqummiussai isummerfigaakka. Tassanimi oqarpoq ilaanni kommunifogedit namminneq angerlarsimaffimminni inunnik tigummigallaasariaqartartut. Allaat ilaanni kiassaatinut qilersortariaqartarlugit. Isumaqarpunga naalagaaffeqatigiiffimmi nutaaliaasumi taamannak atugassaqartitsineq pissusissamisuunngitsoq, Aaja Chemnitz Larsen oqarpoq.
Nunaqarfiit tamarmik isertitsiveqarnissaat piumasarinngilaa, pisariaqartitsinerulli misissorneqarnissaa isertitsiviillu sananerisa akiinut naleqqiunnissaat piumasaraa.
- Akissaqatinneqarnersoq oqallisigineqartariaqartoq isumaqarpunga, taamaammat siullermik qanoq pisariaqartitsisoqartiginera misissorneqartariaqarpoq, tamassumalu kingorna paasissutissat aallaavigalugit isertitsiviliortoqassanersoq aalajangiisoqarluni, Aaja Chemnitz Larsen oqarpoq.
Isertitsiviit kommunefogedillu pillugit naalagaaffiup politiivisa pisortaat qaammatip uuma ingerlanerani oqaloqatigissallugu Aleqa Hammondip Aaja Chemnitz Larsenillu oqaatigaat.
