Siumut IA-lu sulinermut ilanngaammik eqqusserusuttut

Isertitakinnerusut sulinikkut iluanaaruteqarnerusariaqarput, Siumut Inuit Ataqatigiillu taama isumaqarput. Sulinermut ilanngaatip ukiut arfinillit ingerlanerini atuukkiartortinneqarnissaa Siumup tallimanngornermi siunnersuutigaa, Inuit Ataqatigiillu sulinermut ilanngaammik eqqussisoqarnissaa partiimit kissaatigineqartoq aamma siusinnerusukkut oqaatigisimavaat.

Sulinermut ilanngaatip akissarsiartoqqunernut immikkut akileraarummik eqqussinikkut aningaasalersorneqarnissaa Inuit Ataqatigiit kissaatigaat, tamannalu isertitat naligiinnerulersinneqarnissaannut partiip aaqqiissutissatut siunnersuutigaa. "Inuiaqatigiinni aningaasatigut siuariartornerup sulinermut ilanngaammut aningaasaliinissaa" Siumup kissaatigaa.

AAMMA ATUARUK Sulinermut ilanngaammik eqqussiniarneq SIK-p GE-llu qularnartoqartikkaat

- Taamanikkut oqaatigaarput - aamma oqaqqissaagut, siunertaa pinngitsoorani imaanniartussaavoq, sulinermut ilanngaatip inernerissagaa soorlu SIK-p isumaqatigiissutai najoqqutaralugit aningaasatigut isertitanut qaammammut 1000 koruuninik siuariaataassasoq. Akileraarutitigut oqilisaaneq pineqartunut 10 procentit missaannik naleqassaaq, Siumut sinnerlugu qinigassanngortittoq Evelyn Frederiksen taama allappoq.

Taamaammat sulinermut ilanngaatip aningaasalersorneqarnissaanut aningaasat ikitsuinnaanngitsut Siumup nassaariniartussaassavai. Partiimit paasissutissiissutigineqarpoq aningaasaqarnermut naalakkersuisoqarfiup naatsorsuinerisa takutikkaat sulinermut ilanngaatip 1 procentia 30 millionit koruunit missaannik pisortanut naleqartassasoq.

Akissarsiartoqqunernut akileraarut itigartereernianngikkaa

Taamaammat sulinermut ilanngaat tamakkiisumik 2023-mi atulerpat siunnersuutigineqartoq 300 millionit koruunit missaanik akeqassaaq. Evelyn Frederiksenillu naatsorsuutigaa innuttaasut amerlanerusut sulilernerisigut sulinikkullu iluanaarutissap anginerulerneratigut imminnut pilersornerulerpata aningaasat ilaat pissarsiarineqarsinnaassasut.

Evelyn Frederiksenip siunnersuutip piviusunngortinnissaannut tunngatillugu akissarsiaqqortunernut immikkut akileraarutip eqqartorneqarsinnaanera itigartereerusunngilaa:

- Qinersinerup kingorna isumaqatigiinniarnerit tamanna takutikkumaarpaat, Evelyn Frederiksen taama oqarpoq.

AAMMA ATUARUK Sulinermut ilanngaat isertitakkaanit aningaasalersorneqarsinnaasoq

AAMMA ATUARUK Suliffeqarnermut ilanngaat tamanut iluaqutaassanngilaq

2018-imut aningaasanut inatsisissatut siunnersuut sulinermut ilanngaatip qanoq eqqunneqarsinnaaneranut naatsorsuinernik aamma imaqarpoq. Akissarsiaqqortunernut immikkut akileraarusiisoqassagaluarpat sulinermut ilanngaatip aningaasalersornissaanut qanoq iluanaaruteqarfiutigisinnaanera atorfilittat naatsorsorsimavaat:

Naalakkersuisoqarfiup naatsorsuineri naapertorlugit, assersuutigalugu ukiumut 1 million koruunit sinnerlugit isertitallit akissarsiartoqqunernut immikkut 10 procentimik akileraaruserneqarnerisigut ukiumut 20 aamma 30 millionit koruunit ilassutitut pissarsiarineqarsinnaapput.

Taakkuli sulinermut ilanngaammut tamarmut matussutaanissaannut naammanngillat, taamaammallu politikerit aningaasat amigaatigineqartut sinneri aningaasanut inatsimmi allatigut nassaariniartariaqartussaassavaat.

Akissarsiartoqqunernut immikkut akileraarummik eqqussisoqarnissaa Demokraatit itigartitsissutigaat.

AAMMA ATUARUK IA kinguariaateqassaaq – siuttunngussallunili