Siumut IA-lu Qaasuitsup Kommuneani suleqatigiilerput
Qaasuitsup Kommuneata ikaarsaariarnermut ataatsimiititaliaani kommunalbestyrelseulersussamilu Siumut IA-llu suleqatigiissutigisassatik arlallit taakkartorpaat.
Meeqqat atuarfii, ilinniaqqinnissamut periarfissat aamma inuussutissarsiutit ullutsinnut tulluussarnissaat siullertut suliniarfigineqassapput, assersuutigalugu sulisartuuneq periarfissanut nutaanut eqaannerusumik ikaarsaariartinniarneqassalluni.
Nukissiuutinik periarfissat nutaat misissuiffigineqarlutillu aqqutissiuunneqassapput, soorluttaaq inissialiortiternermi periarfissat nutaat ujartorneqassasut.
Meeqqanut inuusuttunullu politikkip saniatigut aamma utoqqarnut innarluutilinnullu politikki pineqartut peqatigalugit ilusilersorneqassaaq, kiisalu utoqqarnik isumassuinermi avatangiisit ullutsinnut naleqquttut pimoorullunit inerisarneqassallutik.
Siumut Atassummik ikaarsaariarnermut ataatsimiititaliami suleqateqarnini -Atassutip ilaasortaatitaasa ataatsimeeqataasannginnerat pillugu - qaammammi matumani siusinnerusukkut taamaatippaa.
Qaasuitsup Kommuneani Siumut aamma Inuit Ataqatigiit suleqatigiilernermikkut Kattusseqatigiit Partiiat ataatsimiititalianut inissitsiternerni teknikkikkut suleqatigissavaat.
