Nunatta nunanut allanut nammineq politikkeqarnissaa sorsuutigigini, Siumumit Aki-Matilda Høegh-Damip Folketingimi ammaanersiornermi oqalugiarnermini erseqqissaatigaa.Assi: Lasse Strüewing Hansen, Siumut i Folketinget

Siumut Folketingimi: Nunarput nunanik allanik nammineq suleqateqarsinnaalersinneqarli

Danskit kikkunnilluunniit naalakkersuisoqaraluarpata nunatta nunanut allanut nammineq politikkeqarnissaa qulakkeertariaqartoq, Siumumit Folketingimi ilaasortaq Aki-Matilda Høegh-Dam isumaqarpoq.

Nunatta nunanut allanut nammineq politikkeqarnissaa aatsaat kissaatigineqalinngilaq. 

Taamaakkaluartoq nunarput nunanut allanut nammineq politikkeqartariaqartoq, Siumumit Folketingimi ilaasortap, Aki-Matilda Høegh-Damip, Folketingimi sisamanngornermi ammaanersiornermi oqalugiarnermini oqaatigisaqattaarpaa. Danmarkilu tamatumunnga toqqaannartumik akuliuttariaqanngitsoq aamma oqaatigalugu.

- Nunanut allanut politikki nunatsinnut tunngasoq Naalakkersuisut tamakkiisumik akisussaaffigisariaqarpaat. Nunat tamalaat oqalliffii, Danmarkip nunarput pissutigalugu ilaasortaaffigisai, nunatta danskit naalakkersuisui alaatsinaattoralugit siunnersortigalugillu ilaasortaaffigisariaqarpai, Aki-Matilda Høegh-Dam oqarpoq.

AAMMA ATUARUK Mette Frederiksenip savalimmiormiut nunanut allanut politikkimi oqartussaaqataanerulersikkusukkai

Aki-Matilda Høegh-Damip danskit maanna naalakkersuisui socialdemokraatiusut nunanut allanut tunngasunut qanimut suleqatiginerannik nersualaarpai. Nunarpulli oqaasissaqartitaanerujussuusariaqarpoq, tamatumalu danskit allanik naalakkersuisoqalissagaluarpata tunuartinneqannginnissaa neriorsuutigineqartariaqarpoq.

- Taava imaappa, akisussaaffigilersimasarput danskit allanik naalakkersuisoqalerpata annaassagipput? Aki-Matilda Høegh-Dam aperaaq.

Taamaammat nunatta nunanut allanut politikkia Nuummiit akisussaaffigineqalernissaa qulakkeertariaqarpoq. Aamma nunanut allanut politikki nunatta akisussaaffigilersinnaanngikkaa tunngaviusumik inatsimmi allaqqagaluarpalluunniit. 

Tunngaviusumilli inatsit arlalinnik periarfissiiffioreerpoq. Assersuutigalugu nunarput Savalimmiullu namminneq maanna inatsisartoqartut, Siumumeersoq erseqqissaavoq.

Danskit politikerii neriorsuuteqanngitsut

Venstrekkut ministeriuneqarfimmiileqqissappata qanimut suleqataajumaartut, Venstrep nunarput pillugu oqaaseqartartuata Christoffer Melsonip neriorsuutigaa.

- Danskimmi naalakkersuisorisimasaasa (Venstre, Konservative Folkeparti, Liberal Alliance, aaqq.) oqaloqatigiinnissamik pingaartitseqalutillu Kalaallit Nunaannik tassanilu politikerinik suleqateqarnerminni assigiinngitsorpassuartigut nutaaliornikuupput. Taamaammat oqaaseqartartoq annilaangasariaqarsorinngilara, taanna Aki-Matilda Høegh-Damimut oqarpoq.

Melsonili nunatta nunanut allanut nammineq politikkeqalernissaanik neriorsuuteqanngilaq.

- Isumannaallisaanermut politikkimut nutaamut tunngatillugu oqaloqatigiinnerulernissap pisariaqarneranut isumaqataavugut, aamma nunanut allanut politikkimut tunngasuni, taanna oqarpoq. 

AAMMA ATUARUK Kalaallit Nunaat nunanut allanut politikkikkut piginnaaneqarnerusariaqarpoq

"Kalaallit Nunaannummi Savalimmiunullumi suna pingaartuunersoq Københavnimi nalilersuisarneq angusaqarfiungaarnavianngilaq". Mette Frederiksen (S) KNR-imit Folketingimut 2019-imi upernaakkut qineqqusaarnermi apersorneqarami taama oqarpoq.

Taannali Høegh-Damip piumasaqaataanut toqqaannartumik oqaaseqanngilaq. Kisianni nunanut allanut politikkimut tunngatillugu suliat Kalaallit Nunaat qanimut suleqatigalugu ataqatigiissaagassat amerliartuinnartut, taanna erseqqissaavoq.

- Naalagaaffeqatigiit nunanut allanut politikkimut tunngatillugu pisarnermit oqaloqatigiinnerusariaqarlutillu suleqatigiinnerusariaqarput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat