Siumut: Eqqartuussiviit aqqutissaanngillat

Canadamiut nalunaareerput, eqqaartuussiviit aqqutiginiarlugit, Nunatsinnilu Naalakkersuisut aamma taama isumaliuteqarlput.

Kisianni naggueqatigiit Inuit immikkut pineqarnissaat, EU-mut eqqusseqqusiunnarnissamik aalajangernermut ilaasoq, iluaqutiginiaraanni isumatusaarnerussasoq, Siumup siulittaasua, Aleqa Hammond isumaqarpoq.

- Canadamut pisussaaffeqanngilagut pinngitsoornata uani peqataaffiginiarnissaannut. Immikkut pineqarneq EU-mut aamma pisussaaffiliivoq, takuniassallugu qanoq sunniuteqarnersoq. Tassalu inatsisiliornerminni Nunatsinnut ajortumik kinguneqannginnissaa siornatigornit eqqummaariffiginerusariaqarpaat. Taamaammat EU-miit uatsinnut tusarniaanissamut pisussaaffeqarnerulerput, Aleqa Hammond oqarpoq.

Siumup siulittasua allappoq, canadamiut puisinniariasiat nunarsuup sinnerani akerliunermut pisuusoq, Nunarpullu tamatuminnga eqqorneqartoq.

Tassalu Siumut, Naalakkersuisuni siuttuunermini Canadamik isumaqatiginnissimasoq, nutaamik isumaqalersimavoq.

Canadap eqqartuussivilersuussiniarnera Nunatta akuliuffigisariaqanngikkaa Aleqa Hammond oqarpoq.

- EU-mi kisermaasisussanngortitaanitta atorluarneratigut, puisit amiinik tunisinerput annertusitissinnaavarput, suleqatigiilluarutta aammalu ataqatigiissaarluakkamik niuernermi ingerlatsigutta,Aleqa Hammond oqarpoq.

Puisinit tunisassianik eqqusseqqusiunnaaneq aamma EU-mi Inatsisartunut pisussaaffiliisoq tikkuarpaa.

- Pisussaapput inatsisip eqqortumik siunertarlu naapertorlugu ingerlatsisoqarnersoq nalilersussallugu.

- Ataavartumik paasititsiniasariaqarpugut. Inatsisiliortoqalersillugu aatsaat paasititsiniaasoqartassanngilaq, EU-mi ilaasortaasuni innuttaasut Nunatsinni pissutsit naluaat. Taamaammat paasisitsiniaanissaq pingaaruteqarpoq, Aleqa Hammond oqarpoq.