KNR-ip pisoq pillugu partiip Siumup siulittaasua, Erik Jensen oqaloqatigaa, taannali siulersuisuunerni ilaasortamut Bernhard Olsenimut innersuussivoq.Assi: Scanpix

Siumut borgmesterinngulersoq pillugu: Suliat inunnut ataasiakkaanut tunngasut oqaaseqarfigineq ajorpagut

Avannaata Kommuniani borgmesterinngulersoq qinersinissamut sapaatit akunneri marluinnanngortut, Eqqartuussisoqarfik Sermersuumi pinngitsuutitaavoq. Unnerluussulli suliassanngorteqqinneqarpoq.

Siumup ilaasortat pineqaatissinneqarsimannginnermik uppernarsaateqanngitsut akuersaanngilluinnarpai.

Siumut taama ilisimatitsisoq Avannaata Kommuniani borgmesterinngulersoq, Minik Høegh-Dam (S), ikiaroornartut pillugit inatsimmik unioqqutitsisimasutut Eqqartuussisoqarfik Sermersuumi 2021-mi marsip 25-ani unnerluunneqartoq pillugu allamik oqaaserumanngilaq.

Minik Høegh-Dam Eqqartuussisoqarfik Sermersuumi pinngitsuutitaavoq. Unnerluussulli, unnerluussisussaatitaasut Nunattat Eqqartuussivianut suliassanngorteqqippaat.

KNR-ip pisoq pillugu partiip Siumup siulittaasua, Erik Jensen oqaloqatigaa, taannali siulersuisuunerni ilaasortamut Bernhard Olsenimut innersuussivoq.

AAMMA ATUARUK Minik Høegh-Dam Avannaata Kommuniani borgmesterinngortoq

- Politikkerput ersarippoq, nultoleranceqarfigivagut tamakkua. Qineqqusaartut tamarmik pinerlussimannginnermut uppernarsaammik tunniusisarput, taanna soorunami tamarmik tunniunnikuuaat, Bernhard Olsen KNR-imut oqarpoq.

Taamaammat tusarliupparput

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Minik Høegh-Dam Avannaata Kommuniani borgmesterinngulerpoq. Taamaammat suliaq borgmesterinngorlaamut tunngasoq tamanut saqqummiuttariaqarluinnartoq, KNR isumaqarpoq. 

Minik Høegh-Dam Eqqartuussisoqarfik Sermersuumi unnerluunneqarnermini pinngitsuutinneqarsimasoq tusagassiuinermi ileqqussat naapertorlugit tusarliutinngilarput.

Unnerluussisussaatitaasulli suliaq taanna Nunatta Eqqartuussivianut suliassanngorteqqippaat – Minik Høegh-Damilu borgmesterinngulerluni. 

Taamaammat tamanna tamanut saqqummiunneqartariaqartoq, KNR isumaqarpoq.  

Minik Høegh-Damilu pineqaatissinneqarsimannginnermik uppernarsaammik tunniussivoq.

154.805 koruunit nassaarigaat

Sulialli Nunatta Eqqartuussivianut ingerlateqqinneqarnera, Siumup qanoq isummerfigaa?

Bernhard Olsenili itinerusumik oqaaseqarusunngilaq:

- Inunnut ataasiakkaanut tunngammat annerusumik oqaaseqarfigisinnaangilara, politikkeriugatta eqqartuussisuunnginnatta suliassatta avataaniippoq, taanna oqarpoq.

Aggustip 24-ani 2018-imi Minik Høegh-Dam-ip inaata ujarlerfiginerani, politiit aningaasat 154.805 koruunit nalingi nassaaraat. Taakkunannga 151.900 koruunit qilertanngortinneqarsimasut isarussat puuiniittut nassaaraat, 2.905 koruunillu aningaasiviani nassaaralugit.

Politiit isumaqarput aningaasat taakku, hashimik 300 grammimit minnerunngitsumit tuniniaanikkut, allatulluunniit inatsisinik unioqqutitsinikkut pissarsiarneqarsimasut. Tamanna allakkami unnerluutiginnissummi allassimavoq.

Unnerluussisut piumasaraat unnerluunneqartoq ulluni 40-ni pineqaatissinneqarsimanut inissiivimmiittussanngortinneqassasoq, taannalu eqqartuussut pinerluuteqaqqinnermi aatsaat atuuttussaatitaassasoq piumasarineqarpoq. Taassuma saniatigut unnerluunneqartoq 15.000 koruuninik akiligassitsissasoq piumasaraat, kiisalu aningaasanik 153.805 koruuninik arsaarinnissuteqartoqassasoq, unnerluunneqartorlu suliap ingerlanerani akiligassanik akiliissasoq aamma piumasaralugu.

Nunatta eqqartuussiviani aalajangerneqartariaqarsorigaat

Illersuisup unnerluussap pinngitsuutinneqarnissaa piumasaraa, uppernarsaatillu amigarineqarmata unnerluunneqartoq Eqqartuussisoqarfik Sermersuumi pinngitsuutinneqarmat, unnerluussisut Nunatta Eqqartuussivianut ingerlatitseqqiinissamik aalajangerput.

- Ingerlatitseqqiivugut isumaqaratta suliaq Nunatta eqqartuussiviani aalajangerneqartariaqartoq. Maannalu taamaaliorpugut, pisumullu atatillugu oqaaseqaqqissinnaanngilanga, unnerluussisuuneq Morten Nielsen KNR-imut oqarpoq.

Suliaq Nunatta Eqqartuussiviani qaqugu suliarineqassanersoq suli ilisimaneqanngilaq. 

Minik Høegh-Dam oqaaseqartinniaraluarparput iluatsinngitsumik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat