Siumut Atassut Inuit Ataqatigillu nerriviup qaanut ilisipput

Siumup Atassutip Inuit Ataqatigiillu pingasuullutik Naalakkersuisooqatigiilernissartik pillugu isumaqatigiinniarnitik ualisoq pingasoqeqqaniit nangippaat. Isumaqatigiinniarnivik pitinnagu toqqammavissat partiinit tamanit saqqummiunneqaqqaarneqassasut, Siumup isumaqatigiinniartitaata aappaa Jonathan Motzfeldt oqarpoq.

- Siullermik naalakkersuinikkut anguniagassagut misissorlugit aallartippagut, taavalu qanoq oqaasertalerneqarnissai pillugit isumaqatigiinniarnerit aallartilerput.

Siumut pingaarnerpaatut qaqitassai pillugit Jonathan Motzfeldt ima oqarpoq:

- Tassa manna tikillugu ilisimaneqarpoq Inuit Ataqatigiillugu ataatsimoortumik siunnerfigut annertoqisut. Naaperiarfissagut tassaniipput. Kisianni maannakkut pinngitsoorata Atassutip peqataaffigisinnaasaasa erseqqisaaffigineqarnissaat tikippagut aammalu sapaatip akunnerata matuma naanerani qularnanngitsumik tamakku erseqqissumik oqaasertaliunnissai maannakkut tulliuppoq.

Inuit Ataqatigiit sinnerlugit isumaqatigiinniartussap aappaata Kuupik Kleist-ip IA-p nerrivimmut qaqitassai erseqqarissuliuutiginianngilai oqarporli:

- Massakkut siulliullugu suliassarput tassaavoq suna toqqammavigalugu naalakkersunngoqatigiittoqarsinnaanera pisinnaanersoq.

IA-p isumaqatigiinniaqataanera Kuupik Kleistip ima tunngavilersorpaa:

- Qinikkatut pisussaavugut nunap naalakkersuisnikkut aqunneqarnissaanik suliaqassalluta. Oqaannarsinnaanngilagut qiningaasinnarluta tamakkununnga peqataarusunnata. Inuit Ataqatigiit ukiuni kingullerni inuiaqatigiinnik annertuumik allanngortitsiniarnermut peqataasimanerput toqqammavigalugu akisussaaffimmik misigisimanerput annertuvoq. Taamattumik ingerlariaqqinnissamut aqqutissiuussinissaq pisussaaffigaarput.

Ataatsimiinneq aallartilersoq pillugu ima oqarpoq:

-Ullumikkut qanoq ittumik inerneqarumaarneq oqaatigiuminaattorujussuuvoq, kisianni piumassuseq akisussaassuseqarnermillu misigissuseq, taakkua aallaavigalugit naammassiniarsarisariaqartutut misigisimavugut.

Kuupik Kleist isumaqarpoq massakkut oqaluttuarisaanermi naalakkersuinikkut nutaaliortoqaraluttuartoq.

- Massakkut pingasuuvugut, aatsaat nunatsinni taanna misilinneqalerpoq, sorunami arlaatigut naammasisaqarsinnaanerput upperingatsigu isumaqatigiinniarnerit aallartippagut.

Atassut sinnerligu isumaqatigiinniartussat Knud Kristiansen Steffen Silassen-ilu oqaaseqartinngitsoorpagut ataatsimiitarfimmut ingerlaannaq isermata. Taamaattorli Atassutip siulittaasua Finn Karlsen ullumi oqarpoq, isumaqatigiinniarnerit aallartippata Atassut toqqammavinnik aamma saqqiussissasoq. Isumaqatigiinniarnerit aallartilugit ullumi ataatsuimiinneq akunnerup missaani ingerlanneqartoq sapaatiuppat ualikkut nangeqqinneqassaaq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat