Siumut, Atassut Inuit Ataqatigiillu isumaqatigiinnialerput

Siumut, Atassut aamma Inuit Ataqatigiit naalakkersuisunngortitsinissaq siunertaralugu ulloqeqqata siornatigut isumaqatigiinniarlutik aallartissapput. Ataatsimiinneq pissaaq naalakkersuisut ataatsimiittarfianni nalunaaqutaq aqqanermut.

- Kaffisoqatigiinneruinnaanngitsumik naalakkersuisunngortitsinissarli isumaqatigiinniutigissallugu partiit pingasuulluta ippassaq unnukkut isumaqatigiissutigaarput. Naalakkersuisuugallartut siulittaasorigallagaat Siumullu siulittaasua Hans Enoksen aatsaarluinnaq taama oqarpoq.

Inuit Ataqatigiit siornatigut oqarsimagaluarput, Siumumik suleqateqaqqinniarnatik, Siumulli siulittaasua erseqqissaavoq, namminneq isumaqatigiinniarnermut siuttuuffik tigummigallartillugu qaaqqusisimallutik.

- Qinersisartut pitsaasumik sullinneqarnissaat siunertaralugu partiit pingasuulluta isumaqatigiinniarnissarput isumaqatigiissutigaarput. Hans Enoksen erseqqissaavoq.

Naalakkersuisoqarfiit agguataarneqarnissaannik tunngasut suli oqaloqatigiissutigineqarsimanngitsut, namminerlu naalakkersuisunut siulittaasunngoqqissanerluni oqaaseqarfigisinnaanngikkallarnerarpaa.

- Naligiilluta oqaloqatigiissaavut. Hans Enoksen oqarpoq.

Siumup siulersuisuuneri naalakkersuisunngortitsinissamut isumaqatigiinniarnerit pillugit ullaatungaa nalunaaqutaq qulingiluanut aamma ataatsimiissapput.