Siumut Atassullu isummaminnik allanngortitsipput
Nunatsinni ilaqutariinnut sullissivinnut aningaasaliissutinik akiliisimaneq inatsisitigut unioqqutitsinerunerarlugu Siumup Isumaginninnermut Naalakkersuisoq Maliina Abelsen sapaatip akunnerata uuma aallartilaarnerani saassutaraa.
Isumaginninnermut Naalakkersuisumut tatiginnikkunnaarnermik Siumut Atassut suleqatigalugu siunnersuuteqarput, siunnersuutaalli Naalakkersuisooqatigiinnik itigartitsissutigineqarluni.
Maannali paasinarsivoq Inatsisartut aningaasaqarnermut ataasimiisitaliaani Siumut ilaasortaatitai marluk Maliina Abelsenip kukkussutaanut mamiasuppiarsimanngitsut. Tamanna aningaasaqarnermut ataatsimiititaliap allakkiaani, KNR-illu pigisarilersimasaani atuarneqarsinnaavoq.
Aningaasaqarnermut ataatsimiititaliap tamarmiusup allakkiaani ima allassimasoqarpoq:
- Naatsorsuutigineqarlunilu tunngavissaatinneqarmat suliami pineqartumi annertunerusumik suliniuteqarnissaq ataatsimut isigalugu ataatsimiititaliamit pisariaqartutut isigineqanngimmat, taamaattumillu suliaq naammassineqartutut isigineqarluni.
Ataatsimiititaliarlu toqqortuisoqarsimannginneranik aamma maluginiagaqarsimavoq:
- Toqqortuinani susimanngitsutulluunniit nassuiaaniarnani Naalakkersuisoqarfiup pisimasoq Aningaasaqarnermut Ataatsimiititaliamut nammineq ilisimatitsissutigigaa ataatsimiititaliamit maluginiarneqarpoq.
Allakkiamili erseqqissarneqarpoq, ataatsimiititaliap suliassaq ilugersunartutut isigigaa.
Per Berthelsen aamma Finn Karlsen tamarmik Siumumeersut, Aningaasaqarnermut ataatsimiititaliami ilaasortaapput. Pisoq suliarineqarmat Finn Karlsen Siumut sinnerlugu ilaasortaanngilaq, taamani Atassut sinnerlugu ilaasortaagami.