Siumut: Aqumiut 90 procentiunissaat angujartuaarneqassaaq
Kisianni nunaqavissut sulisinnaasut amigaatigineqartut, umiarsuarnilu naalakkat arlallit ukiuni tulliuttuni soraarninngortussaammata pissutsit erloqinarnerulissasut, Sulisitsisut Peqatigiiffiat GE taama naliliivoq.
Partii Siumut nunaqavissut sulorineqarnissaannut sulisitsisut peqatigiiffiannut GE-mut suleqatigiiinissamik assamminik isaassivoq.
- GE Kalaallit Nunaanni Sulisitsisut Peqatigiiffiat, Kalaallit Nunaanni ineriartornermut aamma Kalaallit Nunaanni nunaqavissunut nunaqarusuttunullu suleqataaqqullugu kaammattorparput, Siumumi naalakkersuinikkut oqaaseqartoq Jess Svane taama oqarpoq.
Aalisarnermut Pininermullu Naalakkersuisoqarfiup tusarniaanera oktoberip ulluisa 31-annut killeqarpoq, nalunaarullu aqaguani novembarip aallaqqaataani atuutilissalluni.
- Arlaatigut iliuuseqanngikkutta Kalaallit Nunaanni nunaqavissut aamma maani nunaqaannarusuttut, illersorsinnaanerat killeqalersussaavoq, Jess Svane oqarpoq.
AAMMA ATUARUK Naalakkersuisoqarfiup suleriaaserisai pimoorussinerunngillat
Aqumiut nunaqavissut siunnersuummi pineqartut tassaapput Kalaallit Nunaanni qaammatini kingullerni 24-ini kipisuitsumik aalajangersimasumik najugaqartutut inuit nalunaarsorsimaffianni nalunaarsorneqartut. Taakkua Kalaallit Nunaannut tamakkiisumik akileraartuussapput, Kalaallit Nunaannullu kipisuitsumik qaammatini kingullerni 24-ni tamakkiisumik akileraartuusimassallutik.
AAMMA ATUARUK Krusep aqumiut pisinnaasaat sumiuuneranit pingaartinneruai
Kisianni aqumiut nunaqavissut 90-iunissaanik piumasaqaat novembarip aallaqqaataani anguneqarsimanngippat angujartuaanneqassasoq Siumut oqarpoq.
- Aqumiut nunaqavissut sapinngisamik 90 procentiunissaat tamanna siunertaavoq, Jess Svane oqarpoq, - imaanngilaq nalunaarut 1 november atulerpat anguniaqaq anguneqassasoq, kisianni tassa angujartuaarneqartussaavoq, Jess Svane Siumut sinnerlugu Naalakkersuinikkut Oqaaseqartoq taama oqarpoq.
Sulisotsisut peqatigiiffiat, GE, suleqatiserinnilluni maanna nalunaarpoq.
- GE-p aalisartut kalaallillu suliffeqarfiisa tamaviaarlutik anguniagaat tapersersorpai, tamanummi tamanna isumaqarnerpaajummat. GE-lu Siumut-p suleqatigiinnerunissamik kaammattuutaa tikilluaqqulluarusuppaa, upperigatsigumi, ilisimasatigut isiginnittaatsitigullu akunnermi agguaaqatigiinneq - kaffisungaatsiarnermik ilagaanni - pitsaanerpaanik angusaqarfiusinnaasoq, GE-p pisortaa Brian Buus Pedersen allappoq