Siumut aningaasanut inatsisissamut akerliulluni taasissaaq
Aappaagumut aningaasanut inatsisissaq ullumi pingajussaaneerlugu taasissutigineqassaaq.
Aappaagumut aningaasanut inatsisissaq 12 million koruuninik sinneqartoorfiusussaq, Aningaasaqarnermut Naalakkersuisup, Palle Christiansenip, sapaatip akunnerani kingullermi nalunaarutigaa. Ullumilu tassa inatsisissaq taasissutigineqassaaq. Inatsisartuni ilaasortat arlaqartut inatsissap akuerineqarnissaa kissaatigigaluaraat, partiinit tamanit akuerineqarnissaa qularnartoq, Sermitsiaq.ag-mi allaaserineqarpoq.
Ulloq manna tikillugu Siumut arlaleriarluni nalunaartarpoq inatsisissamut akuerseqataaniaratik, soorluttaaq Atassutip inatsisissaq arlalitsigut naammagittaaliutigisaraa. 2011-mullu aningaasanut inatsisissatut Naalakkersuisut siunersuutaat, inatsisartuni ullumi taasissutigineqalerpat Siumut akerleralugu taasissaaq.
Aningaasaqarnermut Naalakkersuisoq Palle Christiansen Demokraatineersoq, siunnersuutip pingajussaaneerneqarnissaanut 65 million kroninik nassaarsimavoq, taamaalilluni amigartoorfiunngitsumik aningaasanut inatsimmik siunnersuuteqarluni.
25 million kronit tassaapput Namminersorlutik Oqartussat piginneqatigiiffiissa tuninerisigut pissarsiassaat, piginneqatigiiffinnullu inatsimmi avammut nalunaarutiginninnginnissamik piumasaqaatit pisisussamillu isumaqatigiinniarneq pissutigatigalugit, Palle Christiansenip oqaatigisinnaanngikkallarpaa piginneqatigiiffik suna pineqarnersoq.
- Pisortat suliffeqarfiisa namminersortunngorsarnissaat tunngaviatigut isumaqatigaarput, isertuasoqarneratigulli upperinngilarput 25 million kronit nalinganut pisisussaqartoq, Per Berthelsen aamma Finn Karlsen oqarput.
Palle Christiansenip 40 million kronit attartortuniit piginnittumut aaqqissuussinermik taaneqartartoq sukkanerusumik ingerlatilerniarpaa, tamannali aamma Siumumiit tutsuiginartinneqanngilaq.
- Aningaasaqarnikkut ajornartorsiorneq suli taamaatinngilaq, paasiuminaapporlu sooq tassanngaannaq qaammatialuit ingerlanerinnaanni pisortat inissiaataasa tunineqarsinnaanerat annertusipiloorsimassanersoq, Per Berthelsen aamma Finn Karlsen sermitsiaq.ag-mi taama issuarneqarput.
