Siumut: Angallannikkut ajornartorsiutinik aaqqiisoqannginnera imaatigut ajunaarnernik kinguneqartarsimavoq
Kaj Lyberthip Anders Olsenillu Kujataani immakkut angallannerup qanoq aaqqiviigineqarnissaa apeqqutigaat.
2013-ip aallartinneraniit helikopterit S-61-it atorunnaarnerisa kingorna Bell 212-it taarsiullugit kujataani angallanneq aallartimmat kinguaattoornerpassuit peqqutaallutik innuttaasut naammagittaalliuutaat imaaginnavissimapput.
Taamatuttaaq kujataani ukiorpassuarni ingammik immakkut nunaqarfinnut kiffartussinerup sumiginnarneqarsimanera peqqutaalluni ilaatigut ajunaarnernik kinguneqartarsimavoq, taamaattumik sinissami kujataani silaannakkut angallassinerup ataavartumik aaqqiivigineqarnissaata tungaanut Bell 212-it saniatigut immakkut illoqarfiit nunaqarfiillu akornanni patajaatsumik angalassinerup piaartumik aaqqivigineqarnissaa, tassalu Kommune Kujalliup aamma Namminersorlutik Oqartussat akornanni isumaqatigiissusiortoqarnissaa pisariaqarpoq, taamaalilluni innuuttaasunut minnerunngitsumillu inuussutissarsiutitigut, takornariaqarnerup kujataatalu ineriartorneranut pitsaanerusumik kinguneqarnissaa anguneqarsinnaaniassammat, Kaj Lyberth Anders Olsenilu allapput.