Siumut akuersaartoq IA qulaajaaqqaaqqusivoq

- Qularutiginngilluinnarparput Alcoap piviusunngornissaa.

Karl Lyberthip aatsitassanut inuussutissarsiutinillu naalakkersuisoq Ove Karl Berthelsenip aluminiumik aatsitiviliornissamut tunngatillugu saqqummiussaa ippassaq taama oqaaseqarfigaa.

Juliane Henningsen IA-meersoq ima aluminiummimik aatsitiviliornissaq pillugu oqarpoq.

- Aaliangernissamut suli tunngavissaqanngilagut, sulimi kisitsisinik eqqortunik takusimanngilagut.

Ove Karl Berthelsenip ullumi radioaviisimut oqaatigaa aatsitiviliornissaq suli nalunarallartoq.

Inuiaqatigiinnut aningaasatigut akileraarnikkut isertitaasinnaasut suliffissaqartitsinissallu pilerinartippai, kulturikkulli eriagisassat aamma eqqarsaatigineqartariaqartut oqaatigalugit.

Nunatta Katersugaasiviata kulturikkut eriagisassat paarineqarnissaat kissaatigaa.

Kisianni tamatumunnga Siumut isumaqataanngilaq.

- Soorunami eriagisassaalluinnartut nunatsinni asseqanngitsut annaanniarneqassapput. Tamakkununnga ilisimasallit atorneqassapput. Siumumiit isumaqarpugut Tasersiaq erngup nukinganut atorneqaruni ullumikkumut naleqqunnerusoq, Karl Lyberth oqarpoq.

Kisianni Inuit Ataqatigiit Katersugaasivissuaq paasilluarsinnaagaluarlugu allanik apeqqutinik akisassanik ujartuipput. Juliane Henningsen ima oqarpoq:

- Suliffissualiornermi eqqagassat suliassallu inuiaqatigiinni sunniutaat suli annerusumik sunniuteqarsinnaapput. Aaliangiitinnata annertuumik misissuisoqaqqaartariaqarpoq.

Aammali Siumut nalornissuteqarpoq. Tassalu sulisartut nunani allamiut, suliniut iluatsissappat pisariaqartinneqartut.

- Alcoamut tunngatillugu sulisartut akikitsut atorutsigit taava aamma siunissami maani nunatsinni ammaaniartoqalersinnaavoq, Alcoa akuerineqassappat aamma suliffeqarfiit oqaluttalissapput akuerineqareernikuummat namminneq akuerineqartariaqarlutik, Karl Lyberth isummersorpoq.

Alcoap suliffissuassaa maanaannaq unittuussagaluarpat, qanoq iliortoqassanersoq, Juliane Henningsen-ip aamma paaserusuppaa.

- Nunarsuarmi aningaasanik aqutsineq aamma nunatsinni aqutsilertussaavoq. Aamma sillimaffigineqartariaqartoq tassaavoq suliffissuup ukiuni quliinnarni ingerlasinnaanera ajornartorsiutinngorsinnaammat, suliartortorpassuit qanoq iliorneqassappat aatsitsiviliorneq matuneqassappat. Nunatsinni aningaasaqarneq qanoq ilineqassava?, aperaaq.