Siumut akissutissaqanngilaq
Taamaammat kommunerujussuit nalilersoqqittariaqarput. Siunissaq qaamanerusoq angunissaa pillugu Siumut ilaatigut taama oqariartuuteqarpoq. Kommunilli allanngussappata aningaasat suminngaanniit aaneqarnissaannik ilusissanik Siumut aningaasaqarnermut oqaaseqartartuat, Jens Immanuelsen siunnersuutissaqanngilaq. Akissullu Naalakkersuisut assaaniissoraa.
- Sullissinerlu pitsaanerulissapaat takorluugaqartoqartariaqarpoq qanoq aaqqissuussisinnaanermik - taanna Naalakkersuisut assaaniippoq, Siumup aningaasaqarnermut oqaaseqartartuat, Jens Immanuelsen KNR-imut oqarpoq.
Kommunit innuttaasunut sullissinerat ajorseriarsimasoraa, tamannalu iliuuseqarfigineqartariaqartoq, taanna isumaqarpoq
- Piginnaatitaaffiit eqqarsaatigigaanni sullissivimmut saaffiginninnittut ingerlaannaq akineqarsinnaaneq pisariaqarpoq. Ullumikkullu aalajangiisarneq eqqarsaatigigaanni innuttaasunut ungasippallaartutut inissisimavoq, Jens Immanuelsen taama oqarpoq.
Kommunerujussuanngortitsineq innuttaasunut ajoqutaasimanerarlugu isornartorsiuigaluarluni sunik allannguinissamik, allannguinerillu taakkua sumik aningaasalersornissaannik erseqqissumik tikkuussinngilaq. Piviusorli tassaavoq inuiaqatigiit utoqqartaqarneruleraluttuinnaratta, pilersuisussallu ikiligaluttuinnarlutik.
Tassalu nunatta karsiata aningaasartuutai allanngussapput, utoqqalinersiutinut peqqinnissamullu aningaasartuuteqarnerulerluta. Taamaammat nunatta karsiani 6,6 milliardit missaanni maanna imaqartumi milliardingajannik politikerit ujaarlertariaqarput.
- Taava uanga imatut paasivara, qanorluunniit akeqaraluarpat kommunerujussuit allanngortinneqassapput?
- Tassami pisariaqarpoq taanna, isiginngitsuusaarsinnaanngilarput isumaginninnikkut sullissineq qiviarutsigu, isiginngitsuusaarsinnaanngilarput innuttaasut saaffiginnikkaluartut akineqartanngitsut. Taamaattumik aaqissussineq ajoreertoq attatiinnarniarneqarsinnanngilaq, Jens Immanuelsen oqarpoq.
- Taava qanorluunniit akeqassappat apeqqutaanngilaq?
- Naalakkersuisut saqqummiiumaarput. Aamma ilaatigut siusinnerusukkut periarfissat allat atorlugit apeqquteqarnikkut oqariartuutigineqartut nalilersuinerit piumaarput aammalu saqqummiussaqarumaarluta, Jens Immanuelsen oqarpoq.
Nunatta karsia 74 millionit koruuninik aappagu aamma amigartooruteqartoqarnissaa, politikerit naatsorsuutigaat.
Naalakkersuisooqatigiilli nunatta karsia 2018-imi amigartooruteqaranilu sinneqartooruteqannginnissaa sulissutigivaat.
