Siumut aamma KNAPK: Aalisarneq imminut akilersinnaasariaqarpoq

Aalisarnermut tunngasut tamarmik imminut akilersinnaasariaqarput.

Partii Siumut kiisalu aalisartut piniartullu kattuffiat KNAPK sapaatip akunnerup massuma naanerani aalisarneq pillugu isumasioqatigiinneranni tamanna siunniunneqarpoq.

Royal Greenland, Arctic Green Food, Sigguk A/S kiisalu Narajaq Consulting isumasioqatigiinnermi peqataapput.

Isumasioqatigiinnermi siunniussat katillugit 14-iupput, nunatsinnilu inuussutissarsiutitut pingaarnersap pitsanngorsaavigineqarnissaa siunniunneqarpoq.

Naalakkersuisut siulittaasuat Hans Enoksen aamma KNAPK-p siulittaasua Peter Olsen isumasioqatigiinnermi siunniussatik atsioqatigiissuteriarlugit tusagassiuutinut saqqummiuppaat.

Assersuutigalugu aalisarnermik ingerlatsinerit tamarmik imminut akilersinnaasumik ingerlanneqarsinnaasunngorlugit aaqqissuussivigineqarnissaat suliassatut taaneqarput,

aalisagartassiissutillu ukiunut arlalinnut, atuuttussanngortinneqartalernissaat siunnersuutigineqarluni.

Aalisartut sulisartullu Royal Greenlandip tunisassiorfiutaani piginneqataasalernissaat naalakkersuisunit aqqutissiuunneqarnissaa pilersaarutinut ilaapput.

Piniarnermut arfanniarnermullu tunngasut pisortaqarfimmiit immikkoortinniarneqarput, immikkut suliarineqartalernissaat pilersaarutigineqarluni.

Tunumi aalisarnerup annertunerusumik ineriartortinneqarnissaa aamma suliniutigineqarniarpoq.

Aalisarnermut piniarnermullu naalakkersuisoq, pisortaqarfimmi atorfillit, inatsisartut aalisarnermut ataatsimiititaliaa biologilluunniit isumasioqatigiinnermi peqataanngillat.