Siumut aamma Demokraatit Nuummi suleqatigiilerput
'Nunatsinni illoqarfiit pingaarnersaanni politikkikkut ingerlatsinermi kapitali nutaaq aallartinneqarpoq,' isumaqatigiissuteqartut suleqatigiinnissamut isumaqatigiissut taama oqaatigaat.
Taamatut isumaqatigiissuteqarnissaq sioqqullugu piffissami sivitsortumi Inuit Ataqatigiit Siumullu akornanni aaqqiagiinngissuteqartoqarpoq. Ilisimaneqareersutut aaqqiagiinnginnerup kinguneranik Siumup IA suleqatigiumajunnaarpaa.
Aamma Atassut Nuup Kommuniani pissaaneqarniunnermut akuliuppoq.
Atassutip manna tikillugu ukiorpassuarnilu kommunalbestyrelsimut ilaasortaatitaa, Atassummut ilaasortaajunnarpoq Inuit Ataqatigiinnullu ilaasortanngorluni.
Hans Pavia Egede isumaqarpoq ukiuni kingullerni Inuit Ataqatigiinnik suleqateqarnini pitsaaqimmat IA-mut ilaasortanngoruni pitsaanerusoq.
Atassutip Nuummi immikkoortortaani siulittaasup Jensine Berthelsenip allagaqarluni Hans Pavia Egede Nuummi kommunalbestyrelsimit tunuaqqullugu kajumissaarpaa, taamaalilluni Atassut kommunalbestyrelsimi ilaasortaatitaqaannarniassammat.