Siumup timigissartarnissamik qineqqusaarnermi neriorsuutaa Pallep timitaleqquaa

Naalakkersuisooqatigiit nutaat qineqqusaarnermi qineqqusaaruterpassuisa ilagaat, nunatsinni sulisut tamarmik sulinerup nalinginnaasup nalaani ullormut nalunaaquttap akunnerani ataatsimi timigissarnissamut periarfissinneqarnissaannik Siumup siunnersuutaa. Akiligassartaalu pisortanit akilerneqassaaq.
juulip 23-at 2013 12:29

Taamatut kissaateqartoqarnera Palle Christiansenip demokraatineersup timitaleqquaa, taamaanngippallu taamaatiinnaqqullugu. Taamaammat Naalakkersuisunut § 37 naapertorlugu apeqquteqaateqarpoq, qineqqusaarnermi neriorsuutigineqartoq timitalerneqangajalernersoq apeqqutigalugu.

Akisuupilussuunissaa qularnanngilaq, taamaammat aamma apeqquteqaateqartup Naalakkersuisut aperai sulinerup nalaani ullormut nalunaaquttap akunnera ataaseq timigissarneq sulisitsisunut, matumani Namminersorlutik Oqartussanut, aktiaateqarluni piginneqatigiiffiit namminersorlutik oqartussanit pigineqartunut kommuninullu qanoq akeqassanersoq.