Doris. J. Jensenip amerlanerusut kalaallisut ilinniartitsisaraluarunik amerlanerusunik ilinniakkamik naammassinnittoqartalernissaa neriuutigaa.Assi: KNR

Siumup siunnersuutaa: Kalaallisut oqaluttunik qanoq ililluta ilinniartitsisoqarnerulissaagut

Doris J. Jensenip ilinniartitsisut tamarmik 80 procentii kalaallisut ukiut qulit qaangiuppata ilinniartitsisanernissaat qanoq ililluni qulakkeerneqarsinnaasoq Naalakkersuisunut misissortikkusuppaa.

Ilinniartitsisut 80 procentiisa kalaallisut ukiut qulit qaangiuppata ilinniartitsisalernissaat qanoq ililluni qulakkeerneqarsinnaanersoq Naalakkersuisunit misissorneqarnissaa, Siumumit Doris J. Jensenip Inatsisartuni ukiakkut ataatsimiinnissamut siunnersuutigaa.

Tamanna meeqqat atuarfiannit Ilisimatusarfimmut ilinniartitsinermut tunngassaaq.

AAMMA ATUARUK Siumup anguniagaa: Kalaallisut oqaatsit 2025-imit ingerlatsivinni atorneqassapput

- Meeqqat atuarfianni naammassinngitsoortartut amerlapput, aamma naammassigaluarlutilluunniit ilinniarfinnut ingerlaqqinngitsoortartut. Ilaatigut tassani pissutaavoq amerlasuutigut qallunaatut tuluttut piginnaasaat killeqartarnerat, Doris J. Jensen KNR-imut oqarpoq.

Siunnersuut ajornartorsiummik aaqqiiniutaavoq, tamatumalu saniatigut ilinniartitsinermi kalaallisuinnaq oqaluttunik siammasinnerusumik qulakkeeriniarnerullunil.

Nunanit allanit ilinniartitsisoqarnissaq suli pisariaqartikkipput

Doris J. Jensenip ilinniartitsisut kalaallisut oqalussinnaanngitsut ilinniartitaanermit peersinneqarnissaannut tunnganngitsoq erseqqissaatigaa.

- Isumaqarpunga nunani allamiunik ilinniartitsisoqarneq aamma pisariaqartoq soorlu Ilisimatusarfimmi paasisaqartarnissarput soorlu nunarsuarmioqataaneq annertuneruleraluttuinnartillugu.

AAMMA ATUARUK Ny leder for Oqaasileriffik: Det grønlandske sprog er udfordret

Meeqqat atuarfiini, inuussutissarsiutigalugu ilinniarfinni, GUX-imi Ilisimatusarfimmilu ilinniartitsisut 80 procentii 2031-mut kalaallisut ilinniartitsisinnaanissaat piviusorsiortoq Doris J. Jensen isumaqarpoq.

Misissuinermit inerniliinerit Inatsisartut akuerissappagit ammaffigineqarnissaat tassunga tunngassuteqarpoq. Aamma kalaallisut oqaluttunik maannakkut atuinissamut tunngavoq.

Ilinniartitsisunut oqaatsinik pikkorissaasoqassasoq

Taassuma ilinniarfissuarmi ilinniarsimasut kalaallisut oqaluttut meeqqat atuarfiini ilinniartitsunngortinniarpai imaluunniit ilinniarsimasut kalaallisut oqaluttut inuussutissarsiornermik ilinniarfinni ilinniartitsisussanngorlugit ilinniarteqqinniarlugit.

- Siunnersuutiga imatut imaqarpoq ukiut qulit ingerlanerani ilinniarfinni ilisimatusarfimmilu ilinniartitsisut 80 procentiisa kalaallisut ilinniartitsisalernissaat anguniarlugu periarfissaaneranni Naalakkersuisut misissuinissaannik siunnersuut. Tassani aamma siunnersuummi tikinneqarsinnaavoq ilinniartitsisut oqaatsinik allanik atuisut kalaallisut oqalussinnaanngitsut aamma kalaallisut pikkorissarneqarsinnaasut, Doris J. Jensen oqarpoq.

Doris J. Jensenip ilinniartitsissutit danskisut tuluttullu allassimasut kalaallisuunngortinneqarnissaannut qarasaasiatigut aaqqiissummik ukiuni qulini tulliuttuni ineriartortitsisoqarnissaa naatsorsuutigalugu aalajangiiffigisassatut siunnersuummini allappaa.

Siunnersuummi misissuinissaq 500.000 koruunit missaannik akeqarnissaa Siumup naatsorsuutigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl