Siumup siunnersuutaa IA-mit illuatungilerneqarpoq
- Inatsisartut oqaluttarfianni oqaatsit atorneqartussat pillugit oqariartortoqarpoq, Inatsisartut oqaluttarfianni 2013-imiit kalaallisuinnaq oqaaseqartoqartalissasoq. Inuit Ataqatigiit tamanna akerlilerparput, isumaqarpugummi innuttaaqatitsinnik nunaqqatitsinnillu oqartussaaqataanermit mattussiniaqattaarneq ukiuni aggersuni aqqutissaanngilluinnartoq, Aqqaluaq B. Egede, Inuit Ataqatigiit politikkikkut oqaaseqartartorigallagaat allappoq, nangillunilu:
- Inuit Ataqatigiinnit eqqaamaqqussavarput Inatsisartut oqaluttarfiannit oqaatsit atorneqartussat pillugit arlalitsigut aalajangersaasoqareermat. Aalajangersaaneq kingulleq pivoq Namminersorneq pillugu inatsisissaq novembarip ulluisa 25-anni 2008-mi qinersisartut amerlanerussuteqarluartut, tassalu 76 procentiisa akuersinerisigut, Aqqaluaq B. Egede allappoq.
Kalaallit oqaasii, inatsisitigut aalajangikkamik Namminersornerup atuutilerneratigut, Kalaallit Nunaanni pisortatigoortumik oqaasiulernerat, Aqqaluaq B. Egedep ilumoornerarpaa, nangillunili:
- Tassanngaanniilli Inatsisartut oqaluttarfiannit kalaallisuinnaq oqaaseqalernissamik piumasaqassalluni ikkappallaaqaaq. Imaappormi Namminersorneq pillugu isumalioqatigiissitat marluusut isumaqatigiissutigivaat oqaatsit Inatsisartut oqaluttarfiannit atukkat qinerseqataasinnaanermut qinigaasinnaanermullu attuumassuteqassasut, taamaattumillu pissutissaqarsorineqanngilaq Inatsisartut suleriaasianni § 53-ip allanngortinneqarnissaanut, Aqqaluaq B. Egede ilaatigut allappoq.
SIK-p siulittaasuata Jess G. Berthelsenip qanittukkut maluginiarpaa, Inuit Ataqatigiit Siumukkut siunnersuutaannut assingusumik siusinnerusukkut siunnersuuteqarnikuummata, tassa Inatsisartut oqaluttarfianniit kalaallisuinnaq oqaluttoqartalissasoq.
