Siumup siorasaarisimanera siulittaasuata ilalinngilaa

KNR-ip aallakaatitaani aalajangersima­sumi IA-meersut marluk sivisuumik oqaaseqartinneqarnerat pillugu Siumup siunnersortaata allakkamini isornartorsiuivoq.

- Tamanut erseqqissumik iliuu­seqanngikkussi Kalaallit Nunaata Radioata tama­tigoortussaaneranik tunngavilinnik aallakaatitassaanik aaqqissuisarnersi artorsimagissi nalilertariaqassavarput, sunalu tamaat sakkugalugu iliuuseqarnissarput ilimagisaria­qassavarsi. Siunnersorti ilaatigut taama allappoq.

- Paasisara naapertorlugu, tusagassiornermut maalaartarfimmut apuunnissaanut eqqarsaasersuuteqarsimapput. Kisianni taamatut nipeqarnissaa uagut siulersuisuniit kissaatigisimanngilarput, taamaattumillu tunuartillugu, Siumup Siulittaasua, Aleqa Hammond oqarpoq.

KNR-ip pisortaata, Ivalo Egedep, taamani Naalakkersuisut Siumullu siulittaasuat, Hans Enoksen allakkat tunuarteqqullugit ataatsimeeqatigaa. Hans Enoksenilumi taamaaliorpoq nutaamillu maalaarusiortitsilluni, tamatumuuna siorasaarutitaqanngitsunik.

Aleqa Hammondip neriorsuutigaa, partiimit pisortatigoortumik allakkat nammineq siunissami nakkutiginerussallugit.

-Isumaqatigiissutigereerparput, tusagarssiortunut nalunaaruteqartoqassappat, siulersuisut peqataatinneqartassasut. Siumut siulittaasua oqarpoq.

KNR-ip pisortaata allakkat siorasaarutitut isigai. Aleqa Hamondilli erseqissarpaa, allakkat utertinneqareersimasut.

- Allakkat utertinneqareerput, aamma KNR-ip pisortaa, tassani siulersuisuni ilaasortamit uagutsinniillu tamanna paaseqatigiissutigineqarpoq, Aleqa Hammond oqarpoq.

Hans Enoksen Radioaviisimit apersorneqarumanngilaq erseqqissarluguli, siunnersortimik taama allassimaneranut aallaqqaammut ilisimasaqarsimanani.

KNR-p pisortaa Ivalo Egede pisimasoq pillugu oqaaseqarumanngilaq, tusagassiutinulli allappoq, KNR-ip taamani qineqqusaarnermut akuliutsinneqannginnissaa pingaartissimagitsik.

- KNR-ip iliuuseqaqquneqarluni sioorasaarneqar­sinnaannginnera pisup takutiinnarpaa, Ivalo Egede allappoq.

Siumumi siunnersorti pineqartoq, Isak Olsen, ullumi oqaaseqartinniaraluarparput iluatsinnaguli.