Assi: Kommuneqarfik Sermersooq

Siumup sakkortuumik isornartorsiuinera borgmesterip akueriumanngikkaa

Siumup Kommuneqarfik Sermersuumi gruppia kommunip pisortaanut sakkortuumik isornartorsiuivoq pisortarlu tatiginagu nalunaaruteqarluni. Borgmesteri atorfilittat pillugit ajornartorsiuteqannginnerarpoq, inullu ataatsip saassunneqarneqarnera akueriuminaatsillugu.

Siumup Kommuneqarfik Sermersuumi gruppiata Peter Davidsenimit siulittaasuuffigineqartup tusagassiuutinut nalunaarummi facebookkikkullu inummik ataatsimik sakkortuumik isornartorsiuinera akuerineqarsinnaanngitsoq, borgmesteri, Charlotte Ludvigsen (IA) isumaqarpoq.

Peter Davidsenip kommunip pisortaa Lars Møller Sørensen inatsisinik malinninngitsutut politikerinullu naammanngitsumik paasissutissiisartutut isornartorsiorpaa, ilaatigut DR-ip piviusulersaarutaata "Byen Hvor børn forsvinder"-ip suliarineqarnera saqqummertussaaneralu pillugit politikerinut paasissutissiisimanngitsutut, taamaalillunilu piviusulersaarutip saqqummernerani politikerit nassuiaanissaannut piareersimatitsinngitsutut isornartorsiorpaa.

Politikerillu piareersimannginnerat pissutigalugu naggataatigut taamani borgmesteri Asii Chemnitz Narup tunuartariaqalertoq, Davidsen oqarpoq.

AAMMA ATUARUK Asii Chemnitz Narup  trækker sig som borgmester

Charlotte Ludvigsenili taama isornartorsiuinermut isumaqataanngilaq.

Sulisut ataasiakkaat pillugit oqaaseqarsinnaanani oqarpoq, ilanngulluguli oqarluni, atorfilittani tamaasa tatigalugit. Borgmesteri aamma isumaqarpoq, kommunalbestyrelsimut ilaasortat naammattumik paasisinneqarluareerlutik aalajangiisartut.

- Kommunalbestyrelsimut suliani ingerlattakkatsinni tamatta ataatsimoorluta aalajangeeqatigiittarnitsinni aamma tamakkua ammasumik ingerlanneqaramik. Taamaattumik ingerlatsivimmi matumani tatiginartumik ingerlatsinerat naqissusersinnaavara, Charlotte Ludvigsen oqarpoq.

AAMMA ATUARUK Kommunip pisortaanut tatiginninnera millivoq

Peter Davidsen naapertorlugu pisortap piginnaatitaaffiginngisaminik qangalili iliuuseqartarpoq.

- Pisortaq namminersortarpoq. Politikkikkut aalajangikkat qulaatiinnarlugit, politikkikkut aalajangerneqanngitsut ilaanni namminersuutigisarpai, Peter Davidsen oqarpoq, nangillunilu.

- Politikkikkullu aalajangikkat atorfilittat ataqqisussaavaat. Atorfilittat taakku avaqqullugit iliuuseqarsinnaanngillat. Taamaaliorunik soorunami soraarsitsinermik kinguneqarsinnaavoq.

Charlotte Ludvigsenili Siumup isornartorsiuutigisaanut isumaqataanngilaq, inunnullu ataasiakkaanut tamanit takuneqarsinnaasumik taama sakkortutigisumik isornartorsiuineq akueriuminaatsillugu.

- Sulisunut ataasiakkaanut tunngassuteqarmat oqaaseqarfigivallaarsinnaanngilara. Kisianni akuerisinnaanngilara atorfilittat tusagassiuutitigut taamatut saassunneqarnerat. Aamma eqqarsaatigisariaqarparput politikkimi uani suliatsinni nukiit pingaarnerpaanut atugassagut tassaapput innuttatsinnut ikiuiniarnermut atugassagut. Inuttassarsiuilluni malersuinerit qimattariaqarpagut, Charlotte Ludvigsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat