Siumup qinigassanngortitai isorliunerusuneersunik pingasunik ilaqqipput
Inatsisartunut qinigassanngortittut amerlanerpaartaat nunatta illoqarfiisa pingaarnersaanneersuupput, Siumulli qinigassanngortitani pingasunik ilaqqeqqammerpai. Partiip qinigassanngortitassatut piukkussaminik tunumeersunik nunatsinnilu illoqarfiit avannarpasinnersaaneersunik nassaarsimavoq.
Allattoq Peter Troelsen, Simon Uldum
januaarip 15-at 2013 06:00
Qinigassanngortittut nutaat tassaapput Mads Ole Kristiansen, Qaanaaq, Andersine Hansen Kristiansen, Tasiilaq aamma Pele Maratse, Kulusuk.
-Siumumi najukkani immikkoortortaqarfiit nammineerlutik qinigassanngortitassaminnik toqqaasarput. Qinigassanngortittut pingasut taakkuninnga ilanerisigut nunarput tamakkerluarparput, aamma qinigassanngortittut taakku pingasut Inatsisartunut ilaasortassatut piukkunnarluinnartuupput. Sinerissami immikkoortortaqarfiit qinigassanngortitsinissaminnut periarfissinneqarsimapput, Qaanaamilu, Tasiilami Kulusummilu immikkoortortaqarfiit maanna taamaaliorput, qinersinermi ataqatigiissaarisoq Bent Møller knr.gl-imut oqarpoq.
