Siumup qinigassanngortitaa: Sara Olsvig eqqunngitsumik oqaluppoq
Ukiuni 2006 - 2007 sammisaq pillugu annertuumik paasititsiniaasoqarpoq, naalakkersuisulli maanna atuuttut naalakkersuisut taarsikkamik suliniutaat malitseqartissimanngilaat. Taamaammat Sara Olsvigip susassaqarfimmut aningaasarpassuarnik atuisoqarsimaneranik oqarnera Martha Lund Olsenip eqqortuusorinngilaa.
-Ukiuni sisamani kingullerni allaanngivippoq eqqarsartoqartoq, ”eqqartorneqanngikkunik ajornartorsiutaanngillat”. Tamannalu annertuumik ajuusaarnarpoq, minnerunngitsumik meeqqanut taamatut kangutsaatsuliorfigineqartunut, Martha Lund Olsen oqarpoq.
Aningaasanut inatsimmi susassaqarfimmut tassunga kontumi meeqqanut immikkut ittumik suliniuteqarnermut kisitsisit uppernarsaatigai. 2009-mi, Siumut Inatsisartuni siulittaasuunerani, susassaqarfimmut 14,5 mio. kr.-it atorneqarsimapput. Kisitsisit taakku 2011-mi 17.7 mio. kr.-inut qaffapput, siornali 15,8 mio. kr.-inut appariaqqillutik.
Qinikkat imminnut ujaqqanik milluuteqattaarneri ajoraluartumik meeqqanut iluaqutissartaqanngilaq, meeqqanummi iluaqutissatuaasoq tassaavoq politikerit partiit tunuliaqutarisatik apeqqutaatinnagit meeqqanik kinguaassiuutitigut atornerluisarnerup akiorniarneqarneranik suliniuteqarnissaat. Meeqqanut eqqugaasunut isumaginninnikkut suliniutinut aningaasartuutinut apparsaataassagaluarpoq, inuiaqatigiillu innuttaasunik ingerlalluartunik pissarsinissaannik qulakkeerinnilluni. Tamannali nunatsinni politikerinut qineqqusaarnerup nalaani piumasaqaatigissallugu immaqa ingasappallaarpoq.