Siumup qinigassanngortitaa: Namminersorlutik Oqartussat aatsitassarsiutileqatigiiffiliorlik
Nunarsuarmi suliffeqarfissuarnik pilersitsiniarnerni pilersitsiniartut aningaasaliisussarsiortarnerat imaluunniit aningaasanik aallartisaanermut atugassanik aningaasaateqarfinnut taarsigassarsiniartarnerat takornartaanngilaq. Soorlu nunatsinni erngup nukinga atorlugu innaallagissiorfinnik pilersitsinialeraangatta nunani allani aningaasaateqarfinnut taarsigassarsiniartarpugut aamma aatsitassarsiutileqatigiiffimmik pilersitsiniarluta nunani allani aningaasaateqarfinnut taarsigassarsiniarsinnaavugut.
- Aap, pilersitsinermi aningaasaliisut aningaasaliissutaasa naafferartumik taarsersornissaat akeqassaaq soorlu aamma aningaasaateqarfinnut atukkatta naafferartumik taarsersornissaat akeqassasoq, qularutigissanngilarpulli siunissaq eqqarsaatigalugu tamanna akilersinnaassasoq pisuussutivummi uumaatsut, soorlu aatsitassat, eqqarsaaatigalugit pisoorsuuvugut namminerlu aamma tamakkua iluanaarutigisariaqarlutigit, Kenneth Rasmussen isumaqarpoq.
Danmarkimi Sverigemilu suliaqarfimmi tassani ingerlatseqatigiiffiinnut naalagaaffimmit pigineqartunut ingerlalluartunullu assersuutissarpassuaqarpoq. Danmarkimi DONG Energy pigineqarpoq, tassanilu inuit 5.400-t sulisorineqarput 2011-milu 56,8 mia. kr.-it kaaviaartinneqarlutik. 2011-mi sinneqartoorutaasut 2,9 mia. kr.-iupput. Sverigemi LKAB pigineqarpoq, tassanilu 2011-mi 27 mia. kr.-it kaaviiartinneqarput 2011-milu 13 mia. kr.-init sinneqartoorutigineqarlutik.
- Namminersorlutik Oqartussat aatsitassarsiutileqatigiiffimmik pilersitsinermikkut nunatsinni aatsitassarsiornikkut qitiusumik inissisimanini qularnaassavaa, aamma nunatsinni aatsitassarsionerup oqimaaqatigiissumik illersorsinnaasumillu ineriartornissaa eqqarsaatigalugu. Suliffeqarfissuaq taanna aatsitassanik ujaasissaaq tunisassiorlunilu siunissamilu annertuumik aningaasanik kaaviaartitsilernera inuiaqatigiinnut uagutsinnut piginnittuusunut pitsaasumik kinguneqassaaq, ilaatigut sanaartugassat angisuut inuiaqatigiit pisariaqartitavut eqqarsaatigalugit toqqaannanngikkaluartumik aningaasalersueqataasutut inissisimalissagami, Kenneth Rasmussen nassuiaavoq.
