Siumup qinersisinnaanermut siunnersuutaa itigartitaasoq
Siunnersuut aappassaaneerlugu oqaluuserineqannginnerani Inatsisinut Ataatsimiititaliamiit taama saqqummiussipput.
Siunnersuut Siumumit oktobarip naalernerani saqqummiunneqarpoq. Savalimmiuniit Danmarkimiillu nunatsinnut noorlaat ukiut marluk nunatsinneeqqaarlutik aatsaat inatsisartunut qinersisalernissaat, Siumup kissaatigaa.
AAMMA ATUARUK Professori: Danmarkimit Savalimmiunillu nunatsinnut noorlaat allatuulli qinersisinnaatitaasariaqarput
Partiit allat isumaqataassappata qinersisinnaanermut maleruagassat maanna atuuttut sukaterneqassapput. Maannakkutut itsillugu danskit nunatsinnut noorlaat, qaammatit arfinillit qaangiunneranni qinersisinnaatitaalertarput. Isumaqatigiissut taanna naalagaaffeqatigiinnermi nunani pingasuni atuuppoq.
- Danskit nunatsinnut nuussimasut qaammatialunnguit nunatsinneereerlutik qinersisinnaatitaalertarnerisa nalilersorneqartariaqarnera Siumumiit eqqaanngitsoorusunngilarput, Karl-Kristian Kruse siunnersuutip Inatsisartuni siullermeerneqarnerani oqarpoq.
Inatsisartut ataatsimiittarfiani oqallinneq, inuit attaveqaqatigiittarfiisigut aamma oqallisigineqarput.
Siunnersuulli Inatsisinut ataatsimiititaliamit itigartinneqarpasippoq.
Inatsimmi atuutilersinniaraanni nunatta nunat assigiinngitsut akornanni pisussaaffiinut, tassalu inuttaasutut politikikkullu pisinnaatitaaffinnut Naalagaaffiit peqatigiit isumaqatigiissutaanneersunut akerliussagunarpoq.
- Ataatsimiititaliap paasinninnerat malillugu Naalagaaffeqatigiit iluanni piginnaatitaaffiit inissisimanerannik taassuminnga allannguineq ajornartorsiutinik nassataqassaaq, Inatsisartut Inatsisinut Ataatsimiititaliaq isumaliutissiissummini taama allappoq.
