Siumup oqaaseqartartua siulersuisuunernit tunuarpoq

Tamanna Sermitsiami ullumi saqqummersumi allaaserineqarpoq.
Aviisimut oqaaseqarnermini - kingornalu aamma Radioaviisimi - Akitsinnguaq Olsenip erseqqissaatigaa, aluminiumut Maniitsumi aatsitsiviliortoqassappat kinamiut sulisussat akissarsiakinnerunissaannik Alcoap Maniitsumi aatsitsiviliornissami piumasaqaataa, Namminersorlutillu Oqartussat tapersersugaat, Siumumit akuersaarneqarsinnaanngitsoq.

Sermitsiami allassimasut naapertorlugit partiimi isumaqatigiinnginneq Akitsinnguaq Olsenip siulersuisuunernit tunuarneranut pissutaavoq. Alcoamit suliniut Siumumit ukiuni kingullerni tapersersorneqartorujussuugaluarpoq.

Sermitsiami paasissutissat eqqortuusut Akitsinnguaq Olsenip Radioaviisimut uppernarsarpai, annerusumilli oqaaseqarusunngilaq.

Siulittaasoq Aleqa Hammond aamma oqaaseqarusunngilaq, tusagassiuutinulli nalunaarut, tallimanngormat kingullermik nassiutani, innersuussutigaa, tassani allassimavoq, Alcoa pillugu suliniutip piviusunngornissaa Siumup tamarmiulluni assut tapersersoraa.

Pisuussutinik akileraarummik taaneqartartup aatsitassarsiorfinnut piumasaqaatigineqartalernissaanik Siumup siunnersuutaa, Aatsitassarsiornermut Naalakkersuisuusimasup, Kim Kielsenip, sapaatip-akunnerani siusinnerusukkut taaseqataaffiginngilaa.

Siunnersuut taanna, Inatsisartut upernaakkut ataatsimiinneranni pingaarnerpaatut partiip siulittaasuata, Aleqa Hammondip, taasaa, ilimagineqareersutut naalakkersuisoqatigiinnit itigartinneqarpoq, Kim Kielsenilli - isumaqataannginnerminik isertuussinngitsup - taaseqataannginnissani tassa qinerpaa. 

Siumup siulittaasua, Aleqa Hammond, Sermitsiami ullumi saqqummersumi oqarpoq, aatsitassat pillugit politikkikkut iluminni isumaqatigiinngittoqaraluartoq, Siumut partiiusoq nukittooq, oqallinnernut annertuunut pisarialinnullu inissaqartitsisoq.

Sermitsiap paasisai naapertorlugit Siumumi siulersuisuunerni Akitsinnguaq Olsenip kingoraartigissavaa Kommunit Kattuffianni siulittaasuusimasoq, Enok Sandgreen.