Siumup nuna tamakkerlugu ataatsimeersuarnerani kingullermi peqquserlunneq
Naak Siumup Qasigiannguani ataatsimeersuarneranit ukioq ataaseq qaangiutereeraluartoq kiap partiimi siulittaasuunissaanut immikkoortoq pillugu oqaluttuaq suli naammassineqanngilaq.
Partiimmi kukkunersiuisuata siulersuisullu nuna tamakkerlugu ataatsimeersuarnermit allattukkat misissuiffigeqqissaarpaat, ataatsimeersuarnerlu sioqqullugu peqquserluuteqartoqarsimasoq maanna paasineqarpoq.
Siumut Nuummi immikkoortortaqarfia ilaasortaqassuseq pillugu peqquserluuteqarsimavoq.
Unioqqutitsineq akuersaarneqarsinnaanngitsoq
Pisoq nassuiaruminaangajappoq, kisianni naatsumik oqaatigalugu immikkoortortaqarfiup ilaasortaqassusai aallaavigalugit immikkoortortaqarfik ataatsimeersuarnissamut aallartitassai amerlassusilerneqartarput.
Ilaasortat 100-nit amerlanerugaangata tamanna ataatsimeersuarnissamut pingasunik aallartitaqartitsisarpoq.
Siumullu Nuummi immikkoortortaqarfia 100-t sinnerlugit ilaasortaqarnerarsimavoq, tamannali peqquserlunnerusoq maanna paasineqarpoq. Siumut tusagassiuutinut nalunaarummi allappoq.
Partiip unioqqutitsineq akuersaarneqarsinnaanngilluinnarnerarpaa.
Siulittaasumut taasinermut peqquserlunneq
Siumup Nuummi immikkoortortaqarfiani siulittaasuusimasoq, Qarsoq Høegh-Dam inuillu atiisigut taaneqanngitsut allat ilaasortanut allattorsimaffik eqqunngitsoq ataatsimiinneq sioqqullugu nassiussimavaat.
Allattorsimaffik taanna pissutigalugu immikkoortortaqarfik nuna tamakkerlugu ataatsimeersuarnissamut pingasunik aallartitaqarsinnaatinneqarpoq.
Siulersuisuunerit pisoq ilungersunarluinnartuunerarpaat, ataatsimeersuarnermilu tassani partiimi siulittaasussamik toqqaasoqartussaanera pissutigalugu suli ajornerunerarlugu.
Erik Jensen, Aki-Matilda Høegh-Dam aamma Kim Kielsen siulittaasumut qinigassanngortittuupput.
Siumup ilaasortaasimasut partiimit maanna partiimi ilaasortaajunnaareersimammata annerusumik malersoqqinneqassannginnerarpai. Taamaattorli Siumup suli ilaasortaasut sinneri pisumut qanoq ilisimasaqarsimanersut pillugit nassuiaateqaqquniarlugit allappaa.
